Giya ed Pampili na Maong Iran Kaulop

INKUAN na sakey a report diad Reader’s Digest a saray kalangweran so paigigiya ed saray kalimog da imbes a diad saray atateng da no nipaakar ed panangawes tan musika. Makana sirin ya amtaen na atateng no siopay kaulop na ananak da tan kawalaan da.

“Responsabilidad yo so manusisa,” so kuan nen Esmé van Rensburg, senior lecturer diad departamento na sikolohiya ed sakey ya unibersidad ed Abalaten ya Aprika. Inyarum to: “Saray posiblin nagawa et naingongotan so anak yo ed sikayo, balet ta onkalma ra lanlamang.” Insan to inter so onggendan iran makatulong a punto ed atateng. Kaukolan a makatunongan iray totontonen tan walaan na piho iran manunan prinsipyo; talineng yoy anak yo; ag-onuunganget, balet ta mansiansian kalmado, tan seguradoen yo no antoy labay yon ibaga. No akapikaaro lay anak yo ed sakey a makapuy a kaulop, iyapasakey ed agnaabobonan ya ugali a pinawala na pikakaaro imbes a basta sebelan so piulop ni ed arum.

Abayaglan walay maabig a simbawa parad atateng diad Salitay Dios, say Biblia. Singa bilang, isasalaysay to: “Masiglat komon ya ondengel, mapalna ed pansalita, mairap a manpasnok.” (Santiago 1:19) Intarya met na Kasulatan iyan maabig a simbawa nipaakar ed pampili na saray kaulop: “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.” (Uliran 13:20) Iyiilustra na sarayan alimbawa so kakabatan a niwala ed saramay manbasa na Biblia tekep na apresasyon tan mangiyaplika ed no antoy ibabaga na satan nipaakar ed inagew-agew a kabibilay.