Matalonggaring a Taon Parad Panangibunog na Biblia
DAKEL a totoo natan so walaan na Biblia nen say kapiganman. Ontan so ipapanengneng na report na United Bible Societies, ta tinmagey na masulok a kapalduay milyon so nibunog a Biblia ed 1998 nen say ed apalabas na satan a taon. Diad ami-amin et masulok a 585,000,000 a Biblia—diad intiraminti odino kabiangan to so nibunog la ed sankagloboan. “Makapaseseg iya,” kuan na report. “Dakel a totoo so nasasabi la natan tekep na Salitay Dios.”
Siempre, walay pandumaan na pakawalaan na Biblia tan say pambasa ed satan. Alimbawa, imparungtal na sakey a surbi a masulok a 90 porsiento ed saray taga-Amerika so walaan na ag-onkulang ed sakey a Biblia, tan ontan met a karakel so manisian say Biblia et maabig a libron pakaibangatan nipaakar ed moral. Balet, 59 porsiento labat so nankuan a sikaray ontutupleg ed Biblia parad simbawa. Tan inaksobi na 29 porsiento a sikaray balanglan “agtanto” odino “agbalot” mikabisado ed Biblia.
Aglambengat mangiimprinta tan mangibubunog iray Tastasi nen Jehova na saray Biblia noagta mangikokondukta met ira na libren panangiyaral na Biblia ed totoo diad masulok lan 230 a daldalin. Minilyon ed sankamundoan so nagugunggunaan la natan ed sayan edukasyonal a programa nipaakar ed Biblia. Natutulongan iran manalona ed saray probleman kidudungetan da, tan naaaralan da no antoy ibabaga na Biblia nipaakar ed marakep ya arapen diad silong na Panarian na Dios.—Isaias 48:17, 18; Mateo 6:9, 10.
[Saray litrato ed pahina 32]
Saray panangiyaral na Biblia ed (manlapud tagey a kawigi a manpakawanan) Bolivia, Ghana, Sri Lanka, tan Inglatera