Say Il-iliwen To ed Syudad na New York

SAY karatula dia so matalonggaring a nipapanengneng ed sakey ed saray bilding a pagawaan na Watchtower Society ed Brooklyn, New York, nanlapula’d dekada na 1950. Napapanonotan iray pasahero, turista, tan arum nira ya onlalabas ed satan a lugar a kaukolan dan basaen so Biblia ya inagew-agew. Ipapanengneng na onggendan a sulat a naawat manlapud manmarmarikit a Tasi so inka-epektibo na sayan panonot.

“Kakatongtongen koy kaklasek no antoy labay kon gawaen kapangraduar ko ed haiskul. Insan ko imbaga ed sikato so nipaakar ed Bethel, say hedkuarter na Tastasi nen Jehova, tan asagyat a maong ed saya. Imbaga ton sikatoy abayag a nanayam ed New York. Say pamilya to so agtanton relihyoso, balet kinabuasan ton natatandagan so karatulan akasulatay, ‘Read God’s Word the Holy Bible Daily.’ Kanian antis a maneskuela et inagew-agew ton babasaen so Biblia.

“Kayari inyalis da manlapud syudad, inkuanton say bengatlan il-iliwen to ed Syudad na New York et sano ombangon, anggapo lay nanengneng ton panonot a kaukolan ton basaey Biblia. Balet lapud saman a karatulan walad bilding na Watchtower, niyugali to lay manbasa na Biblia, kanian tuloytuloy ni so inagew-agew a panagbasa to na Biblia!”

Talagan say pambasa na kabiangan na Salitay Dios so sankarakpan a paraan diad pangigapo na sanagew! Diad panggawa ed satan, seguradon naapresiam iray salita nen apostol Pablo: “Saray masanto a Sulsulat, [so] makayari a manggawa ed sika a makabat ed kilalaban, lapu ed panamegley na pananisia a wala ed Kristo Jesus.”​—2 Timoteo 3:15-17.