Sikatoy Inatey Lapud Prinsipyo

“NONODNONOTEN mi si August Dickmann (nianak nen 1910), sakey ed Tastasi nen Jehova.” Nigapo ed ontan so inskripsion ed plake (a nipanengneng dia) ya agano nin niparungtal diad datin panangipangawan a kampo ed Sachsenhausen. Akin a makanepegan so sakey ed Tastasi nen Jehova na ontan a plake? Ituloy ya isalaysay na inskripsion no akin: “[Sikato] so pinaltog na saray SS diad arap na publiko nen Setyembre 15, 1939, lapud tinalindegan toy agpansundalo.”

Nipisok si August Dickmann diad Sachsenhausen a panangipangawan a kampo nen 1937. Taloy agew kayari na interak na Guerra Mundial II nen 1939, sikatoy ingganggan a manpirma ed autorisasyon na panserbi to ed militar. Lapud agto pirmaan, impaamta itan na komandante na kampo ed si Heinrich Himmler, say hepe na SS (Schutzstaffel, say manunaan a guardia nen Hitler), tan kinerew to’d sikatoy permiso a pateyen si Dickmann diad imaton na amin a priso. Nen Setyembre 17, 1939, unong ed report na The New York Times manlapud Alemanya: “Si August Dickmann, a mantaon na 29, . . . so pinatey dia panamegley na firing squad.” Inkuan na dyaryo a sikato so sankaunaan ya Aleman a tinalindegan toy agpansundalo ed saman a bakal.

Balet, anemaplon taon ed saginonor, nen Setyembre 18, 1999, say impatey nen Dickmann so ninodnonot na Brandenburg Memorial Foundation, tan say pakanodnonotan a plake so mangipapanonot natan ed saray ombisita ed inkakpel tan putel a pananisia to. Say sakey nin plake ya akapeket ed paway na padir na datin kampo so mangipaamta ed saray bisita a sakey labat si Dickmann ed manga 900 a Tastasi nen Jehova a pinairap ed Sachsenhausen nisesengeg ed saray sisiaen da. Dakel ni so pinairap ed arum niran kampo. On, anggan ed silong na saray graben kipapasen ed saray panangipangawan a kampo, dakel so nansiansian matoor ed maridios iran prinsipyo.

Parad Tastasi nen Jehova, sakey a Kristianon obligasyon so ‘itulok ed saray atagtagey [gobierno] a pakauley.’ (Roma 13:1) Balet, sano sikaray piliten na saray gobierno ya onsumlang ed saray ganggan na Dios, tumboken da so alimbawa na saray apostol nen Kristo, a nankuan: “Nakaukolan ya unoren mi so Dios, nen saray totoo.” (Gawa 5:29) Bilang resulta, diad mundo a say pambubusolan na tribu tan panggugulaan na etniko et pansesengegan na makapakebbiew a pampapateyan, saray Tastasi nen Jehova ed inerman a pasen et gegemtanen day kareenan a singa si August Dickmann. Tutumboken da so simbawa na Biblia: “Agka paraeg ed mauges; noag ingen say maong so panaeg mo ed mauges.”​—Roma 12:21.