Sano say Ag-Iyesel et Piabobon
SAY libron Betrayal—German Churches and the Holocaust so matuan manisingbat ed impluensia na relihyon ed Nazismo. Oniay ipapabitar na libro: “Say pananuporta ed pananguley so kasmak la ed limog na saray Kristiano tan agbalot sinuppiat na baleg a karaklan so panamasegsegang ed saray Judio. Say ag-iyesel unong ed sayan kipapasen, so mabitabitar a piaabobon.”
Anto ta so akasagyatan na saray mankuan a Kristiano ed Nazismo? Unong ed salaysay na libro et dakel so naingganyo ed “paraan a ley-tan-uksoy [nen Hitler] ed sosyedad na Alemanya.” Oniay kuan na libro: Sikatoy sumpa ed pornograpiya, panagbalangkantis, aborsion, homoseksualidad, tan say ‘kabandayan’ na modernon arte, tan tinumangan to na saray medalya a gansa, pilak, tan balitok iray bibiin makapananak na apatira, anemira, tan walora, diad ontan et apaseseg iran itultuloy so niyugali lan betang da ed ayaman. Saya so manasagyat ed niyugali la iran estandarte, pati met la’d militaristikon nasyonalismo ya inyopresi nen Hitler lapud impamairap na Versailles Treaty ed nasyon, kanian nagmaliw so Nazismo a labalabay la na karaklan, ontan met la’d kaslakan iran Kristiano ed Alemanya.”
Sakey a grupo so nidumaduma. “Saray Tastasi nen Jehova,” kuan na Betrayal, “so ag-akibabali ed karawalan odino angusar na puersa militar.” Siempre, sengegan iya na maruksan panangataki ed sayan melag a grupo, tan dakel ed saray membro to so nipangaw ed panamairapan iran kampo. Ingen, saramay mankuan a patumbok nen Kristo so agnanprotesta. Intuloy nin inkuan na libro: “Saray Katoliko tan Protestanti diad intiraminti so angipatnag na pirmin pambusol imbes a simpatya ed Tastasi nen Jehova, tan akibabali ira ed maruksa iran estandarte nen Hitler nen saramay estandarte na Tastasi ya agpibabali ed bakal.” Agpanduaruwaan a say agda inyesel so mas amairap ed saray Tastasi ed silong na uley na Nazi.
Bangta tuloy ni so pibabali na saray relihyon ed politika na Nazi a panlalapuay pirmin gotgotan, tinawag na Betrayal iray Tastasi nen Jehova a “sakey a relihyoson grupo ya ag-angiyalibansa odino ag-akinonong ed pananguley.”