Report na Saray Manangiyabawag na Panarian
‘Say Salita na Dios so Mangisekar na Pakayari’
DIAD maagew ya isla na Caribbean ed Jamaica, maslak a totoo so mikabisado la ed Biblia. Diad tua, say King James Version so naromog ed amin lawarin kaabungan, tan walaray totoon akaeksperiensya la a “say salita na Dios so mabilay tan mangisekar na pakayari.” (Hebreos 4:12, NW) Sayan pakayari so mamasimbalo na bilay, a singa iyiilustra ed onggendan ya eksperiensya.
Kasemsempet na laki a manngaran na Cleveland manlapud trabaho sanen sakey ed saray Tastasi nen Jehova so binmisita ed sikato. Kayarin innabang so pigaran punto manlapud Kasulatan, say Tasi so angitilak ed sikato na katulongan ed panagaral na Biblia, say Pikakabat a Mangitonton ed Andi-Anggaan a Bilay. Ag-amoria nen Cleveland no panon a say Salita na Dios so mangisekar na pakayari ed bilay to.
Si Cleveland so mamitlon manpipikasi ed sanagew, ya onkekerew ed Dios na tulong pian naromog to so dugan dalan na pandayew ed Sikato. Si Cleveland so kombinsido a saray atateng to so agmandadayew ed suston paraan, balet kayari ton inusisa so arum a relihyon et sikatoy adismaya. Anggaman nadngel to la so nipaakar ed saray Tastasi nen Jehova, sikato so manduaruwa no kasin walad sikara so katuaan. Anggaman ed panduaruwa to, inmabobon si Cleveland a paiyaralan na Biblia ed samay Tasi a binmisita. Akin? Lapud labay ton paneknekan a palso iray Tastasi!
Agnambayag et naaralan nen Cleveland a say imoral a pirerelasyon to ed duaran bii so agmakapaliket ed Dios. (1 Corinto 6:9, 10) Kayari lambengat na amiduan impanaral, sikatoy akapanpakpel a misian la ed pirerelasyon to ed saraman a bibii. Ginapoan to met la so onatendi ed saray Kristianon miting diad Kingdom Hall. Balet saya so angipaarap ed sananey nin angat.
Si Cleveland so aktibon tuloy a mibibiang ed soccer team diad komunidad da, tan saray galaw so makasbel ed pimimiting to. Anto so gawaen to? Anggaman ed pirmin pananesdes na saray ka-team to, say managpasal ed sikara, tan kakaaro to, deniside nen Cleveland ya onekal ed soccer team. On, say Salita na Dios so ginmapon mangisekar na pakayari, ya angimpluensya ed sikato diad panmaongan to!
Apatnagan lamet so pakayari na Salita na Dios sanen innabang la nen Cleveland ed arum so pikakabat to manlapud Biblia. (Gawa 1:8) Bilang resulta, duara ed datin ka-team to so onaatendi la ed saray miting na Tastasi nen Jehova. Sanen kinmualipika la si Cleveland bilang manangipalapag na maong a balita, alikna to so baleg a liket ed ministeryo, diad panguusar to ed Salita na Dios pian tulongan so arum.
Lapud sikatoy tuloytuloy a napapakiwas ed pakayari na Salitay Dios, insimbolo nen Cleveland ed saginonor so dedikasyon to ed Jehova diad panamegley na bautismo ed danum tan apribilehyoan a manserbi bilang sigpot-panaon a ministro tan bilang ministeryal a lingkor ed kongregasyon.
Diad Jamaica tan ed interon mundo, naaaralan na nilibon totoo a say Salita na Dios so “mabilay tan mangisekar na pakayari.”
[Mapa/Litrato ed pahina 8]
(Parad aktual a format, nengnengen so publikasyon)
JAMAICA
[Credit Line]
Mapa tan globo: Mountain High Maps® Copyright © 1997 Digital Wisdom, Inc.