Nepeg Mo Kasi So Magmaliw ya Agnapapagaan?

MORIAEN na maslak a totoo a kagalangan so nipasen bilang agnapapagaan a too, sakey a walaan na relaks, kalmado, tan mapasensian disposisyon. Balet, wala so sananey ya aspekto na pagmaliw ya agnapapagaan. Ibabaga na Biblia: “Say agkapapagaan na saray maatiw so maneral ed sikara.” (Uliran 1:32, NW) Anto so kabaliksan na satan?

Arum a bersion na Biblia so angipatalos ed orihinal a Hebreon salita ed saray balikas bilang “andi-imaton a kaaligwasan” (American Standard Version), ‘mataletalek’ (The New American Bible), tan “inka-kampante.” (The New English Bible) Diad sayan pantalos, say agkapapagaan so misiglaotan ed inkangiras tan andi-alwar kanian inkamaatiw odino inkamakulangkulang itan.

Nen inmunan siglo, saray Kristiano ed kongregasyon na Laodicea so andi-paga odino kampante nipaakar ed espiritual iran kakulangan da. Matalek dan ipapasirayew ya “anggapo so kaukolan [da] a bengatla.” Sikaray kinorehi nen Jesu-Kristo, ya impaimano to a kaukolan dan pabilayen so inkaseseg da bilang Kristiano.​—Apocalipsis 3:14-19.

Say inka-kampante so ugali met na saray totoo ed panaon nen Noe. Sikaray okupado ed minumundo iran bengatla ed bilay, “nankakakan ira tan naninum ira, angaasawa ra tan akiaasawa ra . . . tan agda akabkabatan angga ed sinmabi’ delap, et inyanor to ra ya amin.” Insan inyarum nen Jesus: “Ontan naani so isabi [“kiwawala,” NW] Anak na too.”​—Mateo 24:37-39.

Saray nasusumpal a propesiya na Biblia so pakapatnagan a manbibilay itayo la ed “kiwawala na Anak na too,” si Jesu-Kristo. Komon ta agtayon balot magmaliw a kampante, andi-alwar, mataletalek​—agnapapagaan.​—Lucas 21:29-36.