‘Si Solomon so Ag-akawesan a Singa Sakey ed Saraya’
SARAY rosas a balang a singa saray nanengneng dia so kaslakan lan naiimano diad saray karsada ed mamaabalaten ya Aprika. Sikaray natatawag a cosmos tan nanlapu iratan ed saray tropiko na Amerika. Saratan a marakdakep a karosasan so mangipapanonot ed sakey a leksion ya imbangat nen Jesus. Dakel ed saray onderengel ed sikato so mairap-bilay, tan sikaray mapaga ed saray pisikal a pankaukolan da, tagano tan kawesen da.
“Akin a mapaga kayo nipaakar ed kawes?,” so intepet nen Jesus, “umameng yo ’ray lirios ed uma, no panon so katutubo ra; ag-ira mankimey, ag-ira met maninaramey: Ingen kuan ko’d sikayo, ya anggan si Solomon dia ed amin a karakpan to ag-akawesan a singa sakey ed saraya.”—Mateo 6:28, 29.
Walaray dakel ya ideya no anto so espesipikon klase na rosas a balang a walad kanonotan nen Jesus. Balet, intuloy nen Jesus ya inkompara itan ed kaslakan a tanaman, a kuan to: “Et no onia so panangawes na Dios ed dika na uma, a natan wala, insan nabuas et nibuntok ed dalikan, agkasi nagkalalo so pangawes to ed sikayo, O sikayo melag a pananisia?”—Mateo 6:30.
Anggaman ag-ontutubo iray cosmos ed Israel, seguradon pepekderan na saratan so leksion ya imbangat nen Jesus. Balang lan babantagen iratan odino kukuninengen, talagan saratan so alay dakep tan labalabay a litratoen tan idrowing na saray managlitrato tan pintor. Peteg, aliwan alablabas so impangikuan nen Jesus ya “anggan si Solomon dia ed amin a karakpan to ag-akawesan a singa sakey ed saraya.”
Antoy leksion parad sikatayo natan? Saramay manlilingkor ed Dios so makaseguro a sikaray tulongan to a nawalaan na saray pankaukolan da anggan diad mairap a panaon. Oniay impaliwawa nen Jesus: “Anapen yo so panarian [na Dios] et saraya a bengatla [a singa say nakaukolan a tagano tan kawesen] niarum ira ed sikayo.” (Lucas 12:31) On, saray peteg a gunggona so nagamoran diad pananap ed Panarian na Dios. Balet, antam ta no anto so Panarian na Dios tan anto so gawaen na satan ed katooan? Maliket iray Tasi nen Jehova ya ontulong ed sikan naromog iray ebat ed Biblia.