Say Video a Makatenyeg ed Kapusoan na Saray Tobonbalo

DAKEL a tobonbalo so apaseseg a manmotektek ed kondukta ra sanen abantayan da so video a Young People Ask​—How Can I Make Real Friends?a Lugan na sayan video so makagunggonan makasulatan a simbawa, personal iran balikas na saray kalangweran a Kristiano, tan say makapatenyeg a drama a nibase ed salaysay na Biblia nipaakar ed si Dina. (Genesis kapitulo, 34) Say onggendan iran balikas nipaakar ed say video so nanlapu ed Mexico.

Oniay insalaysay nen Martha: “Say video so anenyeg a maong ed pusok. Singano pinawala itan a parad siak. Inisip ko a magenap la ya amta na saray manbabangat tan kaeskuelaan ko a sakey ak ed saray Tasi nen Jehova. Agko apaneknekan itan panamegley na impanpulong ed sikara. Misalsalamat ak ed amin ya impormasyon ya itatarya nen Jehova, nagkalalo la no satan so makatenyeg a maong ed sikatayo a singa ed sayan video.”

Oniay imbaga nen Juan Carlos: “Sayan video et talagan panmotekteken to ka. Bilang kalangweran, akagawa ak na pigaran kalilingoan tan natatalosan koy liknaan na pigara ed saray karakter na drama. Pigaran taon lay apalabas, nambilay ak a walaay doblin estandarte, balet amoriak a say ontan a kabibilay so mangitarok na mauges iran pansumpalan. Kayarik ya abantayan so video, siak so determinadon manmatoor ed si Jehova.”

Oniay impatua nen Sulem: “Sanen abantayan ko so video, siak so atenyeg a maong. Diad agano ni et tinmunda ak lan manbasa na Biblia, tan agak la tanton manpipikasi ed si Jehova. Sanen nadngel ko iray komento na saray kalangweran a walad video, siak so apakiwas a manaral lamet ed Biblia tan manpikasi ed si Jehova.”

Nipapaarap natan iray kalangweran diad dakel iran angat, tan saray pipilien dan kakaaro ra so mabetbet a mangimpluensyan maong ed nengneng na panagbilay da. (Salmo 26:4; Uliran 13:20) Say video a Young People Ask​—How Can I Make Real Friends? so ontutulong ed dakel pian manggawa na maong iran desisyon nipaakar ed saya.

[Paimano ed Leksab]