Manggawa na Maabig Odino Aglambengat Manggawa na Mauges ed Arum?
“AGMO gagawaen ed arum so agmo labay a gawaen da ed sika.” Sayan diparan ed etika so bibidbiren a nanlapud sakey a bantog a Tsinon managbangat tan pilosopo a si Confucius. Natan, a ngalngali 2,500 a taon lay apalabas, dakel so siansia nin manisia a matunong la so sakey a too diad aglambengat panggawa na makapasakit ed arum.
Tua a walaan na kablian iyan prinsipyo nen Confucius. Diad biek a dapag, say Biblia so mangipaparungtal na sananey nin aspekto na walna tan pisisiglaotan na too. Nilikud ed pankasalanan ed panggaway mauges sumpad kaparan too, sasaglawien met na Biblia so pankasalanan ed agpanggawa na sakey a bengatla, ginagala man odino andi. Oniay insulat na Kristianon babangatan a si Santiago: “Kanian dia ed satan a too ya amta ton gawaen so maong, et agto gawaen dia ed sikato so kawalaan na kasalanan.” (Santiago 4:17) Imbes a bilinen labat iray Kristiano ya agmanggawa na mauges ed arum, si Jesu-Kristo so angitarya na onian simbawa: “Amin a bengatla . . . a labay yo a gawaen na totoo ed sikayo, ontan so gawaen yo met ed sikara.”—Mateo 7:12.
Say orihinal a gagala na Dios et tratoen na amin a too so arum unong ed labay dan pantrato met ed sikara. Inletneg to so sankaabigan ya ehemplo ed panangipatnag na panangiyansakit ed pankaabigan na arum diad paraan na impamalsa to ed totoo: “Ontan a say Dios pinalsa to so too ed indengan ton dili, dia ed indengan na Dios sikato so pinalsa to; say laki tan say bii pinalsa to ra.” (Genesis 1:27) Kabaliksan na saya a maaron pinalangkapan na Dios iray totoo na konsiensia, a sano suston nipasal et mangiwanwan ed sikara a tratoen so arum unong ed paraan a labay dan pantrato ed sikaran dili.
Dakel natan so naandian lay ilalo tan pakaskasi lapud saray totoon bengatbengat tan sinononot lambengat ed dili ran pankaabigan. Malinew ya aliwan say agpanggawa lambengat na mauges tan makapasakit ed arum so nakaukolan, noagta say panggawa met na bengatlan maabig tan makatulong ed sikara. Nisesengeg ed saya, saray Tasi nen Jehova so boluntaryo tan positibon onkikiwas pian tulongan so arum a naamtaan so makapakelaw ya ilalon walad salita na Dios. Sano ombibisita ira ed kakaabay da ya awit so maong a balitan manlalapud Biblia, sikaray papakiwasen na aro, a gagawaen da ed arum so labay dan gawaen na arum ed sikara.