Pipirawaten Mo Ta so Mundo ya Anggapo lay Tatakotan?

“Manbibilay itayo ed ‘lawas makapaaburidon kipapasen na panag-alerto . . . tan anggapo lay nagawaan,’ lapud ‘makapuy a panagdetermina ed . . . kapeligroan a nayarin onsabi ed anggan anton oras tan nengneng ya anggapoy pasakbay.’”

SARAYAN balikas ya inaon na magasin a Newsweek nen imbeneg a taon, so mangipapatnag ed liknaan na dakel a totoo a manbibilay ed sayan magulon mundo. Impabitar nen Jesu-Kristo a saratan a liknaan so onloor diad magano lan arapen. Impasakbay toy panaon a niwalay ontan a pakagonigon ed saray nasyon lapud agda la amtay gawaen da tan saray totoo so napunaw la ed takot tan panatalaran ed saray bengatlan nagawa diad tapew na dalin. Balet, ag-itayo nepeg ya ontakot tan onkapuy, lapud oniay inyarum nen Jesus: “Sano onggapo a nagawa so saraya a bengatla, tangay kayo, et itangwa yo so saray ulo yo; ta say karondon yo asingger la.”​—Lucas 21:25-28.

Diad panedeskribe nen Jehova a Dios ed saray kipapasen na panagbilay na totoo to diad dalin kayari na satan a karondon, oniay inkuan to: “Say baley ko manayam naani ed mareen a panag-ayaman; tan dia ed maligen a paspasen, tan dia ed saray mareen a pampainawaan.” (Isaias 32:18) Diad panamegley na propeta ton si Miqueas, oniay inkuan nen Jehova: “Onyurong ira naani balang sakey ed silong na kiew to ya ubas tan ed silong na kiew to a higos; et anggapo naani manaktakot ed sikara.”​—Miqueas 4:4.

Agaylan nidumaduma itan a kipapasen ed bilay natan! Anggapo lay agnaam-amtaan a peligro a mansesga ed katooan. Imbes a lawas makapaaburidon kipapasen na panag-alerto tan anggapo lay nagawaan, niwala so magnayon a kareenan tan liket.