Kasin Nanonotan Yo?

Naapresya yo ta’n binasa so agano niran paway na Say Panag-Bantayan? Sirin, imanoen no naebatan yo so onggendan a tepetepet:

• Anto so nayarin gawaen na sakey a Kristiano sano sikatoy makakaeksperiensya na emosyonal tan espiritual a pakakekesaw?

Kaukolan tayon amtaen so sengegan na pakakekesaw tayo. Makatulong no nodnonoten tayon maong iray gagawaen tan kaykayarian tayo, ya ekalen so amin ya agnakaukolan a pabelat. Makapangiletneg itayo na realistiko iran kalat unong ed dilin sirkumstansya tayo. Importante so pangasikaso ed espiritual a bunigas tayo tan nepeg a saglawien na satan so maparanay a pampikasi tan pandalepdep.​—8/15, pahina 23-6.

• Akin a literal so pangipapasen na saray Tasi nen Jehova ed bilang a 144,000?

Kayarin nibaga ed si apostol Juan so nipaakar ed 144,000, anengneng to so “baleg ya ulop a sikato so agnayarin bilangen na too.” (Apocalipsis 7:4, 9) No say bilang a 144,000 et simboliko, naandi so puersa odino danet na pandumaan. Tinukoy nen Jesus iramay manuley a kaiba to bilang “daiset a papastolan.” (Lucas 12:32)​—9/1, pahina 30.

• Akin a nilako na sakey ya Israelita ed dayo so ag-aparalaan ya inatey ya ayep?

Say sakey a dayo odino sankaili ya agnagmaliw a proselita so anggapo’d silong na Ganggan. Kanian naabuloyan so sakey ya Israelita ya iter odino ilako iratan ya ayep ed sikato. (Deuteronomio 14:21) Balet say proselita so walad silong na Ganggan tan agmangan na karne na satan ya ag-aparalaan ya ayep. (Levitico 17:10)​—9/15, pahina 26.

• Anto so biomimetics, tan akin a nepeg a magmaliw ya interesado iray Kristiano ed satan?

Sakey itan a lawak ed siensia a manggugunaet a mangalig ed inkadesinyo na palsa. Alimbawa, say sanagin Wright so nandesinyo na eroplano kayari na impanaral da ed ititikyab na angkakabaleg a manok. Sirin, say biomimetics so mamakiwas ed sakey a Kristiano a mangigloria ed Manamalsa.​—10/1, pahina 9.

• Siopa imay abitla ed 2 Corinto 12:2-4 a nitikyab ed paraiso?

Satan a teksto so nidatak a tampol kayari na saray bersikulo ya anaglawi ed impangidepensa nen Pablo ed inka-apostol to. Lapud anggapo so tutukoyen na Biblia ya arum nin too ya akaeksperiensya na ontan tan lapud si Pablo so angisalaysay ed satan ed sikatayo, maseguro ya anengneng nen Pablo iyan pasingawey.​—10/15, pahina 8.

• Antoray pigaran kalidad nen Jesus ya angikualipika ed sikato a magmaliw a Lider a pinili na Dios?

Apansiansia nen Jesus so nagnap a katooran, a matua tan maptek so kondukta to. Sikatoy sigpot a dedikado ed Dios. Si Jesus so awalaan na pirmin panangiyansakit ed totoo tan mabulos a nankimey.​—11/1, pahina 6-7.

• Iner so kawalaan na saray demonyo legan na Milenyo?

Makatunongan ya ipasen tayo a legan na Milenyon Uley nen Kristo et sikaray ipukok ed kaaralman a kaiba si Satanas. (Apocalipsis 20:1-3) Impropesiya na Genesis 3:15 so nipaakar ed panugat ed ulo na serpiente, a lanoren na satan so kipukok to ed kaaralman legan na Milenyo. Kaiba ed bini to iray marelmeng ya anghel, odino demonyo. Say katuaan ya antakotakot ira ed kaaralman so mangipatnag a kabat da iyan magano lan panamuger. (Lucas 8:31)​—11/15, pahina 30-1.

• Akin a nepeg a manalwar so sakey nipaakar ed panag-inum na de-alkohol, anggaman papaliisan toy pakapatnagan na inkabartek?

Arum ya indibidual so agtanton napatnagan ya abartek anggano dakel lay nainum da. Balet, nayarin say sakey so kalkalnan magmaliw lan akadepende ed alkohol tan magmaliw lan “aripen na dakel ya alak.” (Tito 2:3) Amasakbay si Jesus nipaakar ed pagmaliw a ‘napno ed inkasiba, tan panagbuek.’ (Lucas 21:34, 35) Agla nakaukolan a say panag-inum so manresulta ni ed inkabuanges sakbay a nayepyep tan onngiras so sakey​—diad pisikal tan espiritual a paraan.​—12/1, pahina 19-21.