“Mantultuloy a Manbantay”
NENSAMAN et walaray managbantay ed saray wangalan na syudad ontan met ed saray lolooban na templo tan no arum et diad saray pinto na saray pribadon ayaman. Nilikud ed pangiseguron akakapot iray wangalan no labi, sarayan lalaki so manguguardia met. Ambelat iyan responsabilidad, lapud say kaligenan na syudad so akadepende ed ikelyaw da pian pasakbayan so totoo ed antokaman ya onsasabin peligro.
Kabkabat nen Jesu-Kristo so betang na saray managbantay, a tatawagen met a bantay-pinto. Diad sakey ya inkagawa, inyaliling to iray babangatan to ed saray bantay-pinto tan pinaseseg to iran mansiansian akabantay nipaakar ed panampot na Judion sistema na bengabengatla. Oniay inkuan to: “Manlikas kayo, manbantay tan mikasi kayo, ta agyo amta no kapigan a panaon. Sikato so singa sakey a too, sanen onla ed sananey a dalin, a tinaynan to so abung to, tan . . . binilin to met so bantay-pinto a manpuyat. Manpuyat kayo [“mantultuloy a manbantay,” NW] sirin, ta agyo amta no kapigan so isabi na katawan na abung.”—Marcos 13:33-35.
Ontan met, diad masulok lan 125 a taon natan, sayan dyurnal a Say Panag-Bantayan so mangipapasabi ed panamaseseg nen Jesus a “mantultuloy a manbantay.” Panon? Singa nisulat ed pahina 2 na sayan magasin, “Sikato so mantutultuloy a manbabantay ed saray nagagawa ed mundo legan a susumpalen na saraya so propesiya na Biblia. Liligliwaen to so amin a totoo ed maong a balita a say Panarian na Dios et magano to lan deralen iraman so mamapairap ed kapara ran too tan ontan met a pagmaliwen ton sakey a paraiso so dalin.” Lapud niimprinta ed masulok a 26,000,000 a kopya ed 150 a lenguahe ed sankamundoan, Say Panag-Bantayan so sankalaknaban a nibubunog a relihyoson magasin ed interon mundo. Diad panamegley na saya, saray Tasi nen Jehova, a singa saramay managbantay nensaman, so mamapaseseg ed totoo ed inerman a pasen a “mantultuloy a manbantay” ed espiritual a paraan lapud say Katawan, si Jesu-Kristo, so maganggano lan ompawil tan mangukom ed sayan sistema na bengabengatla.—Marcos 13:26, 37.