‘Nambabapor Ira a Nambaroy ed Dayat’

SANO akaarap ka ed daongan na Gloucester, Massachusetts, E.U.A., nanengneng mo so akaalagey a gansan estatua na sakey a managtimon, a magunaet a mangimamaneobra ed bapor to legan na bagyo. Ipapanonot na satan ya estatua so nilibon managsigay ed Gloucester ya inaatey diad dayat. Diad angipatoonan na estatua et walay lapida ya akaukitan na saray salita ed Salmo 107:23, 24: “Saray arum nambabapor iran nambaroy ed dayat; diad saray dayat so nanaalaan day pambilay da; anengneng da no antoray ginagaway Katawan, tan saray makapakelaw a ginagawa to’d dayat.”​—Maung a Balita Biblia.

Say panagsigay diad saray masiran pasen ed Atlantiko et mapeligron anapan. Diad Gloucester, a say populasyon ditan natan et ngalngali lan 30,000, wala so 5,368 a lalaki ya inaatey legan iran mansisigay diad dayat dakel lan taon so apalabas. Oniay akasulat diad monumento: “Arum so inyanor na manbanesbes a dagem tan angkakabaleg a daluyon lapud bagyo a nanlapud amianen-bukig. Arum so inatey a manbukbukor diad melag a baloto a niyarawi ed bapor ya angawit ed sikara diad saray pasen a pansisigayan. Nandudumboan so pigaran bapor legan na bagyo kanian linmelereg iratan. Saray arum et atalapos na angkakabaleg a barko a walad rota na saray bapor.”

Say monumento et sakey a maermen a paneknek ed impasyan kimey tan saray kapeligroan ya inkidungetan na saray managsigay diad apalabas iran siglo. Isipen pa so pirmin impandageyem lapud impakaandi na saray kaasawaan, kaamaan, agagi, tan ananak a lalaki. Ingen, si Jehova a Dios so agbalot makalingwan ed saray abalo, naulila, odino saramay inaatey ed dayat. Oniay impabitar nen apostol Juan a nagawa diad arapen: “Say dayat initer to so inaatey a wala ed sikato; tan say patey tan say Hades initer da so inaatey a wala ed sikara.” (Apocalipsis 20:13) Diad panaon na kioli ra, saraman so ‘nambabapor a nambaroy ed dayat’ so peteg a makanengneng ed makapakelaw a “ginagaway Katawan.”