Kasin Labay Mo so Nawalaan na Maong a Kakaaro?

LABAY na maslak a totoo so nawalaan na maong a kakaaro. Mas maliket so bilay no ninabang mo iray eksperiensyam ed maapit a kakaarom. Balet panon kan nawalaan na peteg a kakaaro? Ngalngalin 2,000 a taon lay apalabas, impabitar nen Jesus a say sankaimportantian a sengegan ed itatalona na amin a nengneng na relasyon na too et say agsinisiblet a panangaro. Oniay imbangat to: “Singa laba’yo a gawaen komon ed sikayo na saray totoo, ontan met so gawaen yo ed sikara.” (Lucas 6:31) Satan a balikas, a mabetbet a tatawagen a Binmalitok a Ganggan, so mangipapatnag a kaukolan mo so magmaliw ya agmasiblet tan mabunlok pian nawalaan ka na saray kaaro. Diad simplin panangibaga, pian nawalaan ka na kaaro, kaukolan a magmaliw kan kaaro. Balet, panon?

Agniwala a tampol so maapit a kaaro. On, saray kaaro et aliwa labat a kabkabat. Sikaray napangibesngawan mo na saray liknaan mo. Nakaukolan so pansagpot pian nabayuboan tan napansiansia so maapit a relasyon. Mabetbet a kakaukolanen ed pikakaaro so pangiyuna ed saray pankaukolan na kaarom nen say dilin pankaabigan mo. Say sankaaro so aglambengat manliket ed panliketan na sananey noagta manermen met ed paneermenan na sananey.

Nipanengneng mo so tuan pikakaaro nagkalalo la diad pilikna tan praktikal a panulong ed toon mankakaukolan. Unong ya ibabaga na Uliran 17:17: “Say kaaro mangaro ed saray amin a panaon, et say agi nianak nipaakar ed kasumlangan.” Diad tua, nayarin mas malet ni ingen so relasyon ed kakaaro nen say relasyon ed kapamilyaan. Kuan na Uliran 18:24: “Say too a mikakaaro sikato so gawaen to ed dili a kabagbag to; balet wala so kaaro a lalon maapit nen say agi.” Kasin labay mon naamtaan a nagkalalo no panon a nabayuboan so ontan a maong a pikakaaro? Kasin labay mo so napibilang ed sakey a grupo na totoo a kabkabat lapud panaaroan da? (Juan 13:35) No ontan, maliket iray Tasi nen Jehova ed lugar yo ya ontulong ed sika no panon mon naromog so tuan kakaaro.