Sakey ya Imbisita a Sengegan na Sigpot ya Impanguman

“LABALABAY ko lan istoryaen ed pamilyak so nipaakar ed duaran ‘anghel’ ya imbaki na Dios ed siak.” Ontan so insulat na sakey a laki a binisita na duaran kalangweran a bibii a Tasi nen Jehova. Pigaran simba sakbay na imbisita ra, naandi’d bilay so akulaw to ya akaiba to ed loob na 45 a taon. Sikato so maer-ermen. Saray wala la’d edad ya ananak to so nanligliwa ed sikato, balet ta arawrawi so panaayaman da. Anggapo labat lay binmisita ed sikaton kakaaro tan kakaabay.

“Agak la manpipikasi ed Dios ta liknaen kon arawi ak la ed sikato,” so inkuan na laki sanen sikatoy binisita na duaran mamarikit. Balet, masimpatiya ira ed sikato tan intilakan da na sakey a nibase’d-Biblia a tract ya apauloan na What Hope for Dead Loved Ones? Binasa to itan ed saman lanlamang a labi kanian atambayo.

Ag-abayag, pinmawil iratan a duaran Tasi nen Jehova. Anonotan da so pirmin paneermen to sanen sikatoy primeron akatongtong da kanian pinmawil ira pian sikatoy komustaen da. “Asurprisa ak a maong,” so insulat na laki ed saginonor, “ta saraman a duaran estranghero so angiyansakit ed siak tan nampaga ed kipapasen ko.” Sikatoy apaseseg ed saray imbaga ra ed sikato a nanlapu ed Biblia. Inkuan na saraman a bibii ya ompawil ira. Aliketan so laki tan insulat to so walad tagey iran komento to ya impawit to ed sakey a Kingdom Hall na saray Tasi nen Jehova diad lugar da.

Sakbay na inyalis to ed lugar ya asingger ed panaayaman na sakey ya anak to, sayan laki so inmatendi la ed pantitipon na saray Tasi nen Jehova tan apirungoan to la so pamilya na sakey ed saray kalangweran a bibii. Oniay insulat to: “Onalis ak la manlapud sayan lugar, balet saraman a kalangweran tan say simbaan yo so lawas a walad pusok tan kabiangan ed saray pikakasik. On, manpipikasi ak la natan—a maminpigapiga ni ingen. Siak so sigpot lan anguman. Saraman a kalangweran so walaan na baleg a betang ed satan, tan siak so walaan na magnayon ya utang a linawa ed sikara.”