Sakey a Laki ya Angaro ed Bilay tan Totoo

SI Daniel Sydlik, ya abayag lan membro na Mananguley ya Ulop na saray Tasi nen Jehova, et anampot lay bilay to diad dalin nen Abril 18, 2006, agew na Martes. Sikatoy 87 años tan ngalngalin 60 a taon ya akapanlingkor bilang membro na pamilyan Bethel diad Brooklyn, New York.

Si Brother Dan, unong ya ontan so labalabay a panawag ed sikato na maapit a kakaaro to, so sinmabi ed Bethel nen 1946. Antis na satan, sikatoy nanlingkor ya espisyal payunir ed California tan lapu ed neutral a talindeg to bilang Kristiano, sikato met so niprison agano legan na Guerra Mundial II. Saray eksperiensya to leleg na satan so malinlinew a nisalaysay dia ed istorya na bilay to a pinmaway ed Hunyo 1,1985 na The Watchtower, ya atituloan na “How Priceless Your Friendship, O God!”

Si Brother Sydlik so kabkabat bilang simpli tan mapaabeba, tan mainomay ya asinggeran. Sano sikatoy mangidadaulo na panagteksto ed kabuasan parad pamilyan Bethel, say positibon awawey tan panangaro to ed bilay so mabetbet a napatnagan ed manangilukas iran balikas to: “Makapaliket ta maksil so laman tayo a makapanlingkor ed tua tan mabilay a Dios!” Sano manpapaliwawa ed publiko, ipapaseseg to iyan positibon panmoria ed arum diad panamegley na saray teman “Maliket so Totoo a say Dios Da et si Jehova,” “Panangisindag ed Gayaga nen Jehova,” “Pansiansiaen a Marlang so Espiritu na Dios,” tan “Onsabi ni Labat so Sankaabigan.”

Nen 1970, inasawa nen Brother Sydlik si Marina Hodson a taga-Inglatera, a sikatoy deneskribe to bilang “inter na Dios a tulong.” Sikaray sankaiban nanlingkor ed si Jehova diad loob na masulok a 35 a taon.

Leleg a walad Bethel si Brother Sydlik, sikatoy akapanlingkor ed nanduruman departamento, a singa dia ed panag-imprintaan tan Writing Department. Sikato so nankimey met diad istasyon na radyo a WBBR. Insan, nen Nobyembre 1974, sikato so aturon kabiangan na Mananguley ya Ulop tan diad saginonor et nanlingkor bilang kabiangan na Personnel Committee tan Writing Committee.

Diad masulok a 30 taon ton membro na Personnel Committe, say kimey to so pakabidbiray panamabli to ed totoo. Dakel so pinaseseg to tekep na makbaw a boses, a lawas ton ipapaimano so mablin pribilehyo tayo a panlilingkor ed si Jehova. Naynay ton idadanet a mandedependi so tuan liket dia ed relasyon tayo ed si Jehova tan ed awawey tayo nipaakar ed bilay, aliwan diad saray bengatlan nanengneng.

Anggaman naiiliw a maong na pamilyan Bethel si Brother Sydlik, say ehemplo to bilang sakey a peteg ya angaro ed bilay tan totoo so mansiasiansia. Matalek itayo a sikatoy kaiba ed saramay atukoy ed Apocalipsis 14:13: “Mapalar so saray inatey ya ompatey [para] ed Katawan a manlapu ed natan angga ed arapen, on, kuan na espiritu, tan manpainawa ra ed saray sagpot da, ta saray gawa ra ontumbok ed sikara.”