“Manbunga ni ran Siansia ed Inkamasiken”

DAKEL a totoo diad Mediteraneo iran dalin so mantatanem na palma ed saray sular da. Kabkabat irayan kiew lapud karakpan tan masasamit a bunga na saratan. Niarum ni, manbubunga iraya anggad masulok a sanlasus a taon.

Alay abig a deniskribe nen Arin Solomon na Israel nensaman so talindeg na magangganan Sulamita a singano kiew na palma. (Kanta nen Solomon 7:7) Onia so inkuan na libron Plants of the Bible: “Say Hebreon salita parad palma et ‘tàmâr.’ . . . Nagmaliw iyan simbolo na saray Judio ed inkalimgas tan karakpan kanian mabetbet ya ingangaran ed saray bibii.” Alimbawa, say magangganan agi nen Solomon ed ama et manngaray Tamar. (2 Samuel 13:1) Walaray atateng a siansia nin mangingangaran na ontan ed saray anak dan bibii.

Aliwan saray maganggaganan bibii labat so inyaliling ed kiew na palma. Onia so inkanta na Salmista: “Say matunong onsalindak a singa say kiew a palma: sikato ontubo a singa sakey a cedro ed Libano. Sikara so nitanem ed loob na abung nen Jehova, onaligwas ira ed arap na abung na Dios tayo. Sikara manbunga ni ran siansia ed inkamasiken; sikara makbol tan malangbot ira.”​—Salmo 92:12-14.

Diad piguratibon panangibaga, saramay matoor a manseserbi ed Dios anggaman maedad la so walaay dakel a piparaan ed sayan masanting a kiew a palma. Onia so inkuan na Biblia: “Say ubanan ya ulo sikato so balanget na gayaga; naromog ed dalan na inkatunong.” (Uliran 16:31) Anggaman lapud itatatken et kinmapuy la ira ed pisikal, napapabiskeg so espiritualidad da diad panamegley na regular a panagaral na Salita na Dios, say Biblia. (Salmo 1:1-3; Jeremias 17:7, 8) Lapud makapasagyat iran salita tan maabig ya ehemplo na sarayan matoor a maedad la, sikara so baleg a lapuan na panamaseseg parad arum tan mantutultuloy niran manbubunga a tinaon. (Tito 2:2-5; Hebreos 13:15, 16) Singa say palma, saray maedad la so makapanbunga ni anggaman matatken la ira.