“Pandinayewan Ko so Agaylan Determinasyon To”

SI Günter Grass, sakey ya autor ya Aleman tan analo na Nobel Prize nen 1999 lapud literatura to, so angipalapag na libro nipaakar ed dilin-bilay to nen 2006. Ditan et imbaga ton sikatoy apili a magmaliw a kabiangan na civil defense na Aleman. Sinalambit to met ditan so nandinayewan ton maong a laki, ya anggaman 60 taon lay linmabas et agto nin balot nalingwanan. Diad saramay naimatonan to, sayan laki lambengat so tinmalindeg ed pananisia to anggaman sikatoy napapasegsegang.

Diad sakey ya interbio ed si Grass a nipalapag ed dyaryo a Frankfurter Allgemeine Zeitung, sinalambit to iyan nikadkaduman laki ya agbalot amemben na armas. Imbaga nen Grass a sayan laki so “agsinmuporta ed saray kabkabat ya ideolohiya, balanglan diad dapag na saray Nazi, Komunista, nisay Sosyalista. Sikatoy sakey ed saray Tasi nen Jehova.” Agto la nanonotan so ngaran na satan a Tasi, a pinangaranan toy “Agmi iratan gagawaen.” Asukayan na saray managsukimat na rekord na saray Tasi nen Jehova a sayan laki et si Joachim Alfermann. Sikatoy aminpigan pinepekpek tan pinabpabaingan, insan sikatoy imbartolina. Balet si Alfermann et nansiansian mapekder tan impulisay toy pamemben na armas.

“Pandinayewan ko so agaylan determinasyon to,” inkuan nen Grass. “Tetepetan koy inkasiak: Panon ton naaanosan iratan? Panon to kasin ginawa itan?” Kayari ton asungdoan so agaylan impansagpot dan buyaken so katooran to ed Dios, si Alfermann so impisok ed panangipangawan a kampo ed Shuttof nen Pebrero 1944. Sanen nibulos nen 1945, aliktaran toy bakal tan nansiansian matoor a Tasi nen Jehova anggad impatey to nen 1998.

Si Alfermann so sakey labat ed manga 13,400 a Tasi ed Alemanya tan ed saray bansa ya okupado na saray Nazi, a pinairap lapud pananisia ra. Sikaray angunor ed saray panangiwanwan na Biblia, nansiansia iran neutral tan impulisay day pamemben na armas. (Mateo 26:52; Juan 18:36) Masulok a 4,200 iran Tasi so nipangaw ed saray panamairapan a kampo, tan 1,490 so inatey. Anggad natan et siansian pandidinayewan na saray aliwan Tasi nen Jehova so inkamapekder da.

[Litrato ed pahina 32]

Joachim Alfermann