Kasin Antam La?

Diad Efeso 2:11-15, literal kasi imay tinukoy nen apostol Pablo a padir a mangibibiig ed saray Judio manlapud saray Gentil?

Diad sulat to ed saray taga Efeso, pinandumaan nen apostol Pablo iray Israelita tan saray “sankaili.” Inkuan ton, walay “padir” nensaman a ‘pinansian to’ iyan duaran grupo. (Efeso 2:11-15) Diad tua, say tutukoyen nen Pablo dia et samay “ganggan na saray bilibilin” a niiter panamegley nen Moises, balet lapud ta say inusar ton salita et “padir,” nayarin say anonotan laingen na saray managbasa et samay baton pinagkasamben a talagan wala nensaman.

Nen inmunan siglo C.E., say templo nen Jehova ed Jerusalem et walaay pigaran sular odino patio ya aliwan amin et makaloob. Saray Judio tan proselita lambengat so makaloob ditan, balet diad Korte na saray Gentiles et naabuloyan so amin. Diad baetan na samay sular a walara labat so makaloob tan samay sular a makaloob so amin et walaray malabor a baton barandilyas a pinagka-dibisyon, a tatawagen a Soreg. Manga apatiran piye so katagey na saratan. Unong ed Judion historyador nen inmunan siglo a si Flavius Josephus, walaray inskripsion (niyukit a sulsulat) ed salitan Griego tan Latin a nipeket ed sayan samben, a manesebel ed saray Gentil ya onloob ed saray masanton sular.

Walay aromog a sakey a kompleton Griegon inskripsion a nanlapud sayan padir. Oniay nabasa ditan: “Anggapo komon so sankaili ya onlampas ed samben tan onloob ed naalar a santuaryo. Ta siopaman a naerel et pateyen.”

Mapatnag ya inusar nen Pablo so Soreg bilang representasyon na samay Ganggan a niiter ed si Moises, ya abayag a panaon ya angibiig ed saray Judio manlapud saray Gentil. Ingen, diad masakripisyon impatey nen Jesus, anampot iyan Ganggan, kanian ‘atebag itan a padir ed leet.’

Akin a say kaslakan ya ibabaga et 12 so tribu na Israel anta diad tua et 13?

Saray tribu, odino pamilya na Israel et nanlapu ed saray anak nen Jacob, a diad saginonor et asalatay ngaran to na Israel. Sayan patriarka et walay 12 anak ton lalaki, di Ruben, Simeon, Levi, Juda, Dan, Neftali, Gad, Aser, Isacar, Zabulon, Jose, tan Benjamin. (Genesis 29:32–30:24; 35:16-18) Walay tribun ningaran diad labinsakey ed saraya, ingen ta anggapoy ningaran ed si Jose. Balet, duaran tribu so ningaran ed ananak ton si Efraim tan Manases, ya imbilang iran peteg ya ulo na tribu. Kanian, say tribu na Israel et asabi toy 13. Akin balet a say ibabaga na Biblia et 12?

Diad saray Israelita, saray lalaki ed tribu nen Levi so nitalagan manlingkor ed tabernakulo nen Jehova, insan diad saginonor et diad templo. Kanian agla iraya kaiba ed serbisyo-militar. Inkuan nen Jehova a Dios ed si Moises: “Say barangay [odino tribu] labat nen Levi so agmo nepeg ya ibilang nisay alaen mo so katiponan da ed nanleetan na saray anak na Israel. Noag say ipasen mo so saray Levita a mangasikaso na tabernakulo na panamintuan, tan amin a kagawaan to, tan saray amin a kabiangan to.”​—Numeros 1:49, 50.

Anggapo met so teritoryan niiter ed saray Levita sanen inapag-apag so Insipan a Dalin. Noagta sikaray naikdan na 48 a syudad a walad nanduruman pasen na Israel.​—Numeros 18:20-24; Josue 21:41.

Lapud sayan duaran rason, say tribu nen Levi et ag-ipipila’d listaan na saray tribu. Kanian, diad kaslakan say ibabagan bilang na tribuy Israel et 12 labat.​—Numeros 1:1-15.

[Picture Credit Line ed pahina 21]

Archaeological Museum of Istanbul