Uumanen na Biblia so Bilay

“Danum Koy Alak.”—LUKA ŠUC

INKIYANAK: 1975

BANSA: SLOVENIA

APALABAS: BUANGES

ISTORYAY BILAY KO: Inyanak ak ed Ljubljana, say capital na Slovenia. Balibali impanugaw ko, pero anguman iman nen apat taon ko ta nambikkel si Tatay. Kayari na saman ya inkagawa, kailangan nen nanay so mantrabaho na impasya pian walay ipakan tod sikami nen kuyak.

Nen 15 so taon ko, akiayam ak ed si baik. Malikeliket ak ta dakel ed saray kakaarok et tagad man. Mas bulos ak met ya gawaen so labay ko, aliwan singa nen wala ak ed sikami. Insan nen 16 ko la, abarkada ak ed saramay maniinum na alak kada Sabado-Simba. Pinadukey koy buek ko, rebelyosoy panangawes ko, insan mansisigarilyo ak met la.

Nanusar ak met na nanduruman druga. Pero say kakainum ko so talagan labalabay ko. Nen unaan, ontagay ak labat na pigaran baso, insan nen kien, masulok lan sakey bote so nauupot ko. Anggano abuek ak la, sarasarag kon iyamot. Mabetbet ya amay angob na alak ed ingas ko so pakapatnagan labat ya talagan akainum ak la. Kanian anggapoy ideya na arum ya pigaran litro la na alak, beer, tan vodka so tinanggek ko!

Mabetbet ya siak so manaalalay ed saray kakaarok no mantonggaring la ra kayari na sanlabin impaninum mid disco, anta diad tua et doble ni nainum ko nen say sikara! Aminsan et nangel ko may kaarok ya imbaga ton singa ak kuno abutaw ya barilis. Satan ya aliwliwan termino et uusaren diad Slovenia parad saramay talagan buanges o danum da lay alak. Asakitan ak ed imbaga to.

Insan naisip ko ya anggapoy direksion na bilay ko. Pakaliknak et anggapoy kuentak. Amin ya gagawaen kod bilay ko et andi-kakanaan.

NO PANON YA INUMAN NA BIBLIA SO BILAY KO: Diad saman et apansin kon anguman so sakey ya kaklasek ta nagmaliw ya mauyamo. Mankelaw ak ed impanguman to. Kanian intagar kod sakey ya coffee shop. Nen mantotongtong kami, imbaga to ya sikatoy manaaral na Biblia kaiba iray Tasi nen Jehova. Imbaga tod siak iramay nanaaralan to, tan amin iraman et diad saman ko labat nangel ta anggapon balot so amtak ed relihyon. Insan nen kien et mimiaral ak la, tan nampaiyaral ak met lay Biblia ed sikara.

Baleg so epekto ed siak na saray naamtaan ko lapud panaaral ko na Biblia. Singa bilang, naaralan ko ya manbibilay ti lad panaon ya tatawagen na Biblia ya “kaunoran iran agew.” (2 Timoteo 3:1-5) Naaralan ko met ya asingger lan ekalen na Dios iray mauges ya totoo diad dalin tan ikdan to iray maong ya totoo na tsansan panliketan so bilay ya anggapoy anggaan diad Paraison dalin. (Salmo 37:29) Atalosan ko ya kailangan kon apigeren so bilay ko pian sakey ak ed saratan ya maong ya totoo.

Ibabagak lad saray kaarok iray nanaaralan kod Biblia. Maslak ed sikara et elekan da ak lapud saray ibabagak. Pero salamat ed saratan ya reaksion da, ta anengneng ko ya aliwa ira manayan tuan kakaaro. Atalosan ko ya nagmaliw ak ya mainum lapud saray pibabarkadaan ko, ta anggapo lay arum ya tatalaranan da noag say manbuanges na Sabado-Simba.

Pinultot koy pikakaarok ed sikara, balet akikaaro ak ed Saray Tasi nen Jehova. Napapaseseg ak no kaibak ira, ta talagan inaro day Dios tan gagawaen day anggaay nayarian dan unoren iray estandarte to. Kanian kalkalnak lan nitunda so panagbuanges ko.

MARAKEP IRAN RESULTA: Misalsalamat ak ya maong ed si Jehova ta agko la kailangan so alak pian labat magmaliw ak ya maliket. Agko anta no anto lay nansumpalan na bilay ko no agko inuman may datin kabibilay ko. Amtak ya maliket ak la natan.

Pitoy taon ko lan manlilingkor diad branch office na Saray Tasi nen Jehova diad Slovenia. Lapud akabat koy Jehova tan manlilingkor ak lad sikato, anengneng ko so tuan kabaliksan na bilay ko.