Kasin Walay Bibiin Ministro Diad Saray Tasi nen Jehova?

On, diad interon mundo, minilyon so bibiin ministro ya Tasi nen Jehova. Dakdakel ira ya mangipupulong ed maong a balita na Panarian na Dios. Oniay impasakbay na Salmo 68:11 tungkol ed sikara: “Si Jehova so mangiiter na ganggan; saray bibiin mangiyaabawag na maong a balita et baleg ya armada.”

Pero, duma so ministeryo o gagawaen na saray bibiin ministro ya Tasi nen Jehova ed saray bibiin klero na arum ya relihyon. Antoy pandumaan da?

Mandumaan so audience o ondedengel ed sikara. Saray bibiin klero, lalo la diad Kakristianoan, et ipapasen ya lider diad loob na kongregasyon da, tan saray manunan ondedengel ed sikara et saray kamembro da. Dia balet ed saray bibiin ministro ya Tasi Jehova, say manunan ondedengel diad pampupulong da et saray walad paway na kongregasyon, saray totoon nakakatongtong da no manpupulong irad kaabungan tan arum nin lugar.

Say sakey nin pandumaan da et say papel da ed kongregasyon. Saray bibiin klero diad Kakristianoan tan arum ni ran relihyon et mangidadaulo tan mangibabangat na doktrinay relihyon da ed saray kamembro da. Saray bibiin ministro ya Tasi nen Jehova balet et agmanbabangat ed kongregasyon no walay kaiba dan bautismadon laki. Saray lalakin pinili labat ya manbangat so nepeg ya manggawa ed satan.—1 Timoteo 3:2; Santiago 3:1.

Ibabaga na Biblia ya saray lalaki labat so inikdan na responsabilidad ya mangasikaso ed kongregasyon. Imanoen iyan pangaligan ya inter nen apostol Pablo nen sinulatan to so kaparan ton manangasikaso ya si Tito: “Intilak ta ka ed Creta pian . . . manuro ka na saray mamatatken ed kada syudad.” Inyarum to met ya say apilin laki et nepeg ya “anggapoy pakaakusaan ed sikato, saksakey so asawa to.” (Tito 1:5, 6) Ontan met so imbilin nen Pablo nen sinulatan toy Timoteo: “No walay sakey a laki a dadampoten toy magmaliw a manangasikaso, maabig a kimey so pipirawaten to. Say manangasikaso et nepeg sirin ya anggapoy nabalaw ed sikato, saksakey so asawa to, . . . kualipikadon manbangat.”—1 Timoteo 3:1, 2.

Akin et lalaki labat so nepeg ya mangasikaso ed kongregasyon? Oniay imbaga nen Pablo: “Agko abuloyan a say bii et manbangat odino nawalaan na autoridad ed laki, noagta mansiansian mareen. Ta si Adan so unonan pinalsa, insan si Eva.” (1 Timoteo 2:12, 13) Kanian lapud akaunan pinalsa so laki nen say bii, mapatnag ya saray lalaki so angiteran na Dios na responsabilidad ya manbangat tan mangasikaso.

Aaligen na saray ministro nen Jehova so alimbawa na Lider da, si Jesu-Kristo. Oniay insulat na disipulon si Lucas tungkol ed ministeryo nen Jesus: “Sikatoy linmad saray syudad tan ed saray baryo, ya impupulong tan inyaabawag to so maong a balita na Panarian na Dios.” Insan nen kien, ingganggan nen Jesus iray papatumbok to ya gawaen so parehon kimey: “Linma rad saray baryo, ya inyaabawag da so maong a balita.”—Lucas 8:1; 9:2-6.

Dian panaon tayo, saray ministro nen Jehova ya lalaki tan bibii et aktibon mibibiang ed impasakbay nen Jesus ya, “sayan maong a balita na Panarian et nipulong ed interon dalin bilang pantasi ed amin a nasyon, insan onsabi so anggaan.”—Mateo 24:14.