“Aliwdiway Ugalik”

ISTORYAY BILAY KO:

Mairap labat so bilay diad binalegan kon syudad ya asingger ed daongan na Turku. Champion ed boksing si Tatay ko tan sikami nen agik et mimila met ed boksing. Diad eskuelaan et mabetbet da ak ya pipiliten a miponitian; agko met ira aatrasan. Nen tinedyer ak la, nagmaliw ak a membro na gang, kanian lanang ak a kaibad gulo. Agustoan ko met so heavy-metal tan labalabay koy magmaliw a rock star.

Angaliw ak na drums, nanbuo kami na banda, tan siak so nagmaliw a lead singer. Labalabay kon gawaen so anggan anto ed stage. Lapud agresibo tan makapataktakot so itsura na banda mi, kalkalna kamin nagmaliw a sikat. Ginmapo kami lan mantogtog ed arap na dakel ya audience, nanggawa kami na pigaran recording, say unor ed saratan et agustoan na dakel. Nen bandad sampot na 1980’s, linma kamid United States pian i-promote so banda mi. Aminpiga kamin nan-perform ed New York tan Los Angeles, tan akatongtong mi ray kabkabat a totoo ed music industry antis kamin onsempet ed Finland.

Anggano panliliketan kon kaiba ak ed banda, aanapen ko nin siansiay mas maliket a bilay. Agko labay so kompetensia tan say agresibon ugali ed music industry tan sinmawa ak met lad singa anggapoy direksion a klasen kabibilay. Pakaliknak et mauges ak a too, tan antakot koy napoolan ed impierno. Sinalik ya anapen so ebat ed saray tepet ko diad dakel a klase na relihyoson libro tan mabetbet ak met ya manpipikasid Dios, anggaman parad siak et agkon balot napaliket.

NO PANON YA INUMAN NA BIBLIA SO BILAY KO:

Pian nasuportaan koy sarilik, nantrabaho ak ed post office ed lugar mi. Aminsan, naamtaan kon walay katrabahok a Tasi nen Jehova. Dakel so intepet kod sikato. Saray malinew ya ebat ton based Biblia so akainteres ed siak, kanian nampaiyaral ak na Biblia ed sikato. Kalabas na pigay simban panaaral koy Biblia, akaawat so banda mi na balibalin recording contract tan posiblin ni-release so album mid United States. Inisip kon mataltalag iyan nagawa.

Imbagak ed samay Tasin mangiyaaral ed siak ya labay ko ni manggaway sakey ya album, insan ko lan talaga iyaplika iray prinsipyo na Biblia. Agto ak diniktaan na sarili ton opinyon; impabasa to labat ed siak imay imbaga nen Jesus a walad Mateo 6:24. Oniay ibabaga na satan: “Anggapo so nayarin manpaaripen ed duaran katawan.” Abigla ak nen atalosan koy labay ya ibaga na saraman a salita nen Jesus. Balet kayari pigaran agew, samay mangiyaaral ed siak na Biblia so sinmublay ya abigla! Imbagak ed sikaton lapud labay kon tumboken si Jesus, inmekal ak lad banda!

Say Biblia et singa espiho ya angipaamtad siak na saray kakapuyan ko. (Santiago 1:22-25) Anengneng kon aliwdiway ugalik: Malastog, maambisyon, maayew, makolkol, masigarilyo, tan buanges ak. Nen naimanok ya say kabibilay ko et talagan kontrad saray prinsipyo na Biblia, adismaya ak ed sarilik. Anggaman ontan, akaparaan ak ya manguman.—Efeso 4:22-24.

Pagbabawian kon maong iray agawaan kon kasalanan nensaman. Balet, baleg so naitulong na samay mangiyaaral ed siak. Impabasa tod siak imay walad Isaias 1:18: “Anggan saray kasalanan yo sikara so singa eskarlata, napaputi ra a singa say niebe.” Saya tan say arum ni ran bersikulod Biblia so akakombinsid siak a say Ama tayon walad tawen et mapangasi tan labay ton paabigen iray sugat na saramay magbabawid kasalanan da.

Sanen akabat ko tan naapresyak si Jehova, labay ko lan idedikay bilay kod sikato. (Salmo 40:8) Abautismoan ak nen 1992 diad internasyonal a kombension na Saray Tasi nen Jehova ya agawad St. Petersburg, Russia.

MARAKEP IRAN RESULTA:

Dakel iray nagmaliw a kakaarok ed organisasyon nen Jehova. No maminsan et mankakaiba kamin mantotogtog na mararakep iran musika tan panliliketan mi iyan regalo na Dios. (Santiago 1:17) Say sakey ya espisyal a bendisyon ed siak et say inad-arok ya asawa, si Kristina. Sikatoy kaibak ed amin—diad saray liket tan subok ed bilay, ontan met sikatoy pangibabagaan koy naliliknak.

No agak nagmaliw a sakey ed Saray Tasi nen Jehova, ompan inatey ak la natan. Nensaman et lanang ak a mamoproblema. Natan balet et wala lay direksion na bilay ko, tan natan et singa anggapo lay kulang.