Nasasakitan Met so Dios​—Panon Tayon Napaliket?

Asalim lay asakitan kanian manakis ka?—a Seguro amin tayo et asali to lay asakitan. Alimbawa, nasakitan tayo no napatakba o nasugatan tayo. Pero no maminsan, no walay mangibagan wala kunoy gagawaen mon mauges anta anggapo met, di ba nasakitan ka?— Nasasakitan met so Dios ya Jehova no aliwan tuay ibabaga ran gagawaen to. Pantongtongan ta itan pian naamtaan mo no antoy gawaen mo pian napaliket so Dios imbes ya nasakitan mo.

Nabasad Biblia ya wala ray totoo nensaman ya angibagan inaro day Dios balet ta ‘pinabarong da.’ On, sinakitan day Dios! Nengnengen ta sirin no akin ya nasasakitan si Jehova no agtayo unoren so ibabaga to.

Say sankaunaan ya duaran too et sinakitan day Jehova anta sikatoy Amalsad sikara. Pinanayam to rad Paraiso diad dalin ya say tawag et ‘hardin na Eden.’ Siopa ra yan dua?— On, si Adan tan Eva. Amtaen ta no akin ya asakitan si Jehova ed ginawa ra.

Imbaga nen Jehova ed sikara ya asikasoen da imay hardin. Imbaga to met ya sarag day nawalaan na ananak, saniiba ran manayam ed hardin, tan ag-ira ompatey. Balet antis ya awalaan na anak si Adan tan Eva, walay aliwdiwan agawa. Antam no antoy agawa?— Walay anghel ya sinugsogan toy Eva tan pati si Adan pian manrebelde irad si Jehova. Nengnengen ta no antoy agawa.

Angusar imay anghel na uleg tan singa to pinansalita. Imbaga to may uleg ya onggawan ‘singa Dios’ si Eva. Labay itan nen Eva. Kanian inunor to may pagagawa na uleg. Antam no antoy ginawa nen Eva?—

Inakan nen Eva imay bunga na kiew ya imbaga nen Jehova’n agda nepeg ya kanen nen Adan. Antis ya pinalsa si Eva, ingganggan na Dios si Adan: ‘Sarag moy mangan na labay mo ed amin a kiew diad hardin. Balet amay kiew ya pakaamtaan na maong tan mauges, agmo nepeg ya kanen so bunga to, ta diad agew na pangan mo ed satan ompatey ka.’

Amta nen Eva itan a ganggan. Pero ninengneng to lan ninengneng may kiew, kanian inisip ton singa masarap so bunga to tan “makapaliket ed saray mata.” Kanian ‘nanburbor na bunga tan angan.’ Insan nen kien inikdan to met si Adan, tan angan met. Akin kasi et angan met si Adan?— Ta mas inaro nen Adan si Eva nen say si Jehova. Mas labay ton paliketey asawa to nen say Dios. Pero mas importantin unoren si Jehova nen say anggan siopa!

Natandaan mo ni may uleg ya akitongtong ed si Eva? Di ba say puppet singa mansasalita pero diad tua et boses itan na toon manpapagalaw ed satan. Ontan met ed samay uleg, singa mansasalita pero diad tua et boses itan na arum. Siopay akanboses man ey?— Boses man na “daan ya uleg, samay tatawagen a Diablo tan Satanas.”

Antam no antoy gawaen mo pian napaliket moy Jehova?— Unor kan lanang ed sikato. Imbaga nen Satanas ya natukso to kunoy amin a too pian agda unorey Dios. Kanian oniay ibabaga nen Jehova ed sikatayo: “Anako, onkabat ka, tan paliketen mo so pusok, pian naebatan ko so mamalaw ed siak.” Babalawen o kakantiawan nen Satanas si Jehova. Imbaga ton sarag to kunon patundaen so amin ya manseserbid Dios. Kanian unor kad si Jehova tan serbian mo pian napaliket mo! Labay mo ’tan a gawaen?—