EBAT ED SARAY TEPET ED BIBLIA
Kasin amin a relihyon et mamapagalang ed Dios?
No narengel mo ray balita ed mundo, seguradon naimanom ya no maminsan et nagagawa iray mauges a bengatla lapud relihyon. Aliwan amin ya relihyon et manlalapud tuan Dios. (Mateo 7:15) Talagan dakel so totoon apalikdo.—Basaen so 1 Juan 5:19.
Balet, iimanoen na Dios iray masimoon a totoo ya inaro day kamaongan tan katuaan. (Juan 4:23) Iimbitaan na Dios iray ontan a totoo ya manaral na katuaan a walad Salita to, say Biblia.—Basaen so 1 Timoteo 2:3-5.
Panon mon nabidbir so tuan relihyon?
Pankakasakeyen nen Jehova a Dios iray totoo ya nanlapud nanduruman relihyon diad pangibabangat tod sikara na katuaan tan ibabangat to ran aroen so balang sakey. (Miqueas 4:2, 3) Kanian, nabidbir mo iray walad tuan relihyon diad paraan na pantratrato dad balang sakey.—Basaen so Juan 13:35.
Pankakasakeyen nen Jehova a Dios so amin a klase na totoo panamegley na tuan panagdayew.—Salmo 133:1
Say pananisia tan paraan na kabibilay na saray tuan managdayew et ibabase dad Biblia. (2 Timoteo 3:16) Papagalangan da met so ngaran na Dios. (Salmo 83:18) Tan ipupulong da so Panarian na Dios bilang say alenleneg ya ilalo na totoo. (Daniel 2:44) Aaligen day Jesus diad ‘pangisisindag day liwawa’ ra panamegley na panggagawa day maong ed saray kapara dan too. (Mateo 5:16) Sirin, saray tuan Kristiano et nabidbir diad ibibisitad saray totoo ed kaabungan da pian inabang so maong a balita na Panarian na Dios.—Basaen so Mateo 24:14; Gawa 5:42; 20:20.