MANUNAN ARTIKULO | SIOPA IRAY TASI NEN JEHOVA?
Anton Klase na Totoo Iray Tasi nen Jehova?
Internasyonal ya organisasyon kami, tan anggapoy pikonektaan mid arum ya relihyon. Say world headquarters mi et walad United States, balet karaklan ed Saray Tasi nen Jehova et walad nanduruman bansa. Manga 8 milyon so bilang mi, tan manbabangat kami ed masulok ya 230 ya bansa. Gagawaen mi ya lapud imbaga nen Jesus: “Sayan maong a balita na panarian so nipulong ed interon dalin bilang pantasi ed amin a nasyones.”—Mateo 24:14.
Anggan iner so panaayaman mi, gagawaen mi anggaay nayarian min unoren iray ganggan na bansa. Balet agkami mibibiang ed politika lapud uunoren mi ganggan nen Jesus ed saray Kristiano ya magmaliw ya ‘agkabiangan na mundo.’ Kanian agkami mibabali ed politika tan agkami onsusuporta ed guerra. (Juan 15:19; 17:16) Diad tua, nen World War II, saray Tasi nen Jehova et impriso, pinairap, tan pinatey ni ingen lapud ag-ira mansundalo. Insulat na German ya obispo nensaman: “Sikara labat so relihyon ya makapangibagan ag-iran balot nansundalo nen Third Reich.”
“Makapabilib so moralidad na [Saray Tasi nen Jehova]. Balibali komon ya gawaen a lider na politika irayan agmakasarilin totoo—balet ta agtayon balot itan nagawaan. . . . Maunor irad gobierno balet ta manisia ran say Panarian na Dios labat so makasolusyon ed amin ya problema na totoo.”—Dyaryo ya Nová Svoboda, Czech Republic.
Balet agmi ibibiig so sarili mi. Impikasi nen Jesus ed Dios iray patumbok to: “Kerewen ko ed sika, ya agmo ra eekalen ed mundo.” (Juan 17:15) Kanian nanenengneng mo kami ya mantratrabaho, mangasaliw, tan mani-eskuela ed lugar yo.