Agkayo Mapagpaga

PRINSIPYO ED BIBLIA: “Agkayo la mapagpaga ed bilay yo.”​—Mateo 6:25.

Antoy labay ya ibaga na satan? Imbaga nen Jesus itan diad Sermon to ed Palandey. Base ed sakey ya diksionaryo na Biblia, say Griegon salita ya impatalos ya “mapagpaga” et nayarin ontutukoy ed “natural ya reaksion na too no maniirap, narasan, tan nasasabian na saray problema ed bilay.” Kaibad kapagaan so panaburido ed nayarin nagawad arapen. Natural tan duga labat so pampaga ed materyal ya pankaukolan tayo tan ed pankaabigan na inar-aro tayo. (Filipos 2:20) Balet nen imbaga nen Jesus ya “agkayon balot manpapaga,” bibilinen to ray patumbok to ya paliisan day sobran panaburido​—alabas a panagpaga ed arapen ya mangekal ed liket natan.​—Mateo 6:31, 34.

Makana ni kasi itan natan? Maabig ya unoren so bilin nen Jesus. Akin? Ibabaga na arum a reperensya ya no sobran mapagpaga ray totoo, agla makakapampainawa so kabiangan na nervous system da tan “nayarin pansengegan iya na sakit a singa say ulcer, sakit ed puso, tan asthma.”

Angiter si Jesus na maabig a rason no akin ya paliisan so sobran panagpaga: Anggapoy nagunggona ed satan. Intepet nen Jesus: “Siopa ed sikayo so makapangarum na sankasiko ed dukey na bilay to lapud pampapaga to?” (Mateo 6:27) Say naynay ya pampaga et agto arumay bilay tayo anggano kakapat na segundo, tan anggapoy niiter ton maong. Tan mabetbet ya agmet nagagawa iray pampapagaan tayo. Inkuan na sakey ya scholar: “Sayang labat so pampaga ed arapen, tan saray nagagawad arapen et aliwan singa kauges na saray pampapagaan tayo.”

Panon tayon napaliisan so pampaga? Unona, manmatalek ed Dios. No papakanen na Dios iray manok tan kakawesan to na mararakep iray rosas, agto kasi itarya iray nakaukolan na totoo ya iyuuna dad bilay da so pandayew ed sikato? (Mateo 6:25, 26, 28-30) Komadua, sansakey labat ya agew so isipen. “Agkayon balot mapagpaga nipaakar ed ontumbok ya agew, ta say ontumbok ya agew et nawalaan na saray kapagaan ton dili,” kuan nen Jesus. Manisia ka ya “magenap la parad kada agew so kaugsan ton dili”?​—Mateo 6:34.

No unoren tayoy maabig ya bilin nen Jesus, naiwasan tayoy mansakit. Tan lalo la, ondeen so liknaan tayo​—atan may ibabaga na Biblia ya “deen na Dios.”​—Filipos 4:6, 7.