Magmaliw a “Mapaga ed Saray Maabig a Gawa” Legan na Abril!
1 Legan na Abril, say kalat tayo et amin a manangipalapag so mibiang ed ministeryo. Talagan makapaseseg no amin a manangipalapag ed sayan bansa so nawalaan na pibibiang ed panagpulong a kimey antis a mansampot so Abril. Lapud tariwa ni ed nonot tayo so Memoryal na impatey nen Kristo, maseguron labay tayon ipatnag so apresasyon tayo ed kaabigan na Dios diad pangiyapay tayo na direktan “bagat a panangidayew” diad lawak na ministeryo.—Heb. 13:15.
2 Legan na nakekeraan a kabiangan na Abril, nepeg a panggunaetan a tebeken iray pankaukolan na balang membro na kongregasyon ta pian amin so nawalaan na maseseg a pibiang antis a manampot so bulan. (Roma 15:1) Saray manangasikaso na panagaral na libro so nepeg a mikabat a maong ed saray sirkumstansya na saramay kagrupo ra tan mangiyopresi na praktikal a tulong sano nakaukolan. Kasin walay mankaukolan na transportasyon? Siopa so makapangitarya ed satan? Kasin walaray agmasmasel odino mabaing? Kasin makapikimey so mas eksperiensyado laran manangipalapag ed sikara? Komusta met iramay walaan na beblay odino agla makasarag? Kasin makapibiang ira ed panagtasi panamegley na telepono, diad pansulat, odino diad arum nin mabungan kimey?
3 Arum a nagmaliw ya inaktibo so nayarin napakiwas diad intalineng da ed paliwawa ed Memoryal nen Abril 12. Kanian maabig a pansagpotan ya asinggeran so siopaman ya inaktibo ya inmatendi ed Memoryal tan iyopresi a dalawen ira tan nayarin pian iyaralan ira na Biblia. Kayari na Memoryal, nayarin say nipanpanaon ya ibisita so mamakiwas ed sikaran magmaliw ya aktibo lamet tan mibiang lamet ed ministeryo.
4 Ipasal Iray Kalangweran a Mibiang: Dakel ya ananak na saray Tasi nen Jehova so mimila ed atateng da diad panagkabkaabungan ed loob na dakel lan taon, anggaman agni ira manseserbi bilang agbautismadon manangipalapag. Kasin natan la so panaon parad sikara pian onggapo? Kasin napapakiwas so puso ra tan akaparaan la ran nawalaan na makabaliksan a pibibiang ed kabkaabungan a kimey? Saray ulo na pamilya so makaimano a makatulong so panrepaso ed pahina 81 parapo 4 anggad pahina 82 parapo 1 na libron Organisado sano dedeterminaen no kasin saray ananak da so kualipikado lan magmaliw a manangipalapag, insan tumboken so totontonen a nidatak ditan.
5 Gagawaen na Saray Kualipikadon Estudyante na Biblia so Kimey a Ginawa nen Jesus: Ag-inyapasakey nen Jesus so panagbangat to ed pangiter na instruksion nipaakar ed saray doktrina. Sikatoy akiulop ed saray estudyante to ed ministeryo tan imbangat to ira no panon so pampulong. (Luc. 8:1; 10:1-11) Anto so situasyon natan? Masulok a sanlasus libon iyaaralan na Biblia so nikokondukta ed Pilipinas. Segurado, panamegley na matukoy a panamaseseg dakel ed sarayan iyaaralan so makapanggawa ed ontumbok a kundang ed kipasal da tan onkualipikan manserbi bilang agbautismadon manangipalapag ed Abril.
6 No mangikokondukta kayo na panangiyaral na Biblia, konsideraen irayan tepet: Kasin onaaligwas so iyaaralan, a mitunosan ed edad tan abilidad to? Kasin ginmapo lan manginanabang na pananisia to ed arum ed impormal a paraan? Kasin isusulong to lay ‘balon inkatoo’? (Col. 3:10) Kasin nakakapet to iray kualipikasyon parad agbautismadon manangipalapag, a nidatak ed pahina 79-81 na libron Organisado? No panisiaan yo a sikatoy kualipikado, akin ya ag-isingbat so pamaakaran ed sikato? Arum ya iyaaralan so mankaukolan na mas ni nen say direktan panangimbita a mibiang ed kimey. Siempre, no mabulos so iyaaralan, nakaukolan nin unona ya iyuksoy na manangidaulon manangasikaso so pitongtong ed sikato na duaran mamatatken, singa ed dati lan gagawaen. Diad biek a dapag, nayarin walay pakapupugeran na iyaaralan. Nayarin say sakey ed saray mamatatken so miulop ed sikayo ed iyaaralan yo na Biblia tan paibesngaw ed iyaaralan iray liknaan to nipaakar ed katuaan. Kayarin tinalineng so ibabaga na iyaaralan, say matatken so makapangiter na praktikal iran suhestion, tekep na Makasulatan a tulong.
7 ‘Anamoten so Panaon’ Pian Man-auxiliary Payunir: Kada taon legan na panaon na Memoryal, say pisasalamat ed dondon so mamakiwas ed nilibo ya “anamoten” odino saliwen so panaon pian magmaliw ya auxiliary payunir. (Efe. 5:15-17) Anggaman kaukolan iray panagsakripisyo, baleg iray tumang. Sakey a makapadinayew a bilang na saray kalangweran so mangaanamot ed bakasyon ed eskuelaan pian man-auxiliary payunir. Saray wala la’d edad a mantratrabaho so manguusar ed saray labi tan sampot-simba pian anamoten iyan parehon aktibidad. Lapud say Abril ed sayan taon et walaan na limaran Sabado tan limaran Simba, seguradon dakel so makayarin manggawa ed saya. No agkayo akapanpalista ed Abril, akin ya agnonoten so pan-auxiliary payunir ed Mayo ta pian nasubaybayan so interes ya aromog legan na Abril?
8 Balanglan nayarian yoy man-auxiliary payunir odino andi, mananap na paraan pian napadaak yoy serbisyo yo ed lawak legan na Abril. Mangiletneg kayoy personal a kalat, samay mankaukolan na pansagpot pian nadampot, ingen ta posiblin nagawaan. Say pilalek yon ‘pangusar tan sigpot a manpausar’ ed serbisyo ed si Jehova, unong ed personal iran sirkumstansya yo, so bendisyonan to.—2 Cor. 12:15, NW.
9 Saray Pantitipon Parad Lawak na Serbisyo: Saray pantitipon parad lawak na serbisyo so nepeg ya inagew-agew ya iyuksoy no posible legan na Abril. Nepeg a walay probisyon a gawaen parad panagtasi ed labi. Say maslak iran manangipalapag et mibiang ed lawak na serbisyo ed saray sampot-simba, kanian saray kongregasyon so nepeg a mangiyeskedyul na saray pantitipon parad lawak na serbisyo ed saray Sabado, namparan diad kabuasan tan ngarem.
10 Mamatatken—Nakaukolan so Panagplanon Maong: No posible, maabig no nakimeyan na kongregasyon so amin a teritorya ra legan na bulan na Abril tan Mayo. Nepeg a niiter so nikaduman imano ed pankimey ed dinanman a pasen na negosyo a nipabtang ed kongregasyon. Saraman so mankimey ed satan so nepeg ya akaparaan a maong tan mankawes na pormal. Agnakakaukolan so komplikadon presentasyon. Sano aasinggeran so negosyante, nayarian yon ibaga a matalag yon nasabi iray negosyante ed abung, kanian ondadalaw kayo ed pasen na negosyo to pian iparungtal so sakey ya artikulo a seguradon makapainteres ed sikato. Insan nayarian yon inabang ed antikey a paraan so sakey ya espisipikon punto ed magasin. Say panagtasi ed karsada panamegley na saray magasin so nepeg met a naorganisa ed dugan paraan ed nasasakopan a teritorya na kongregasyon. Nayarin wala niray arum a lugar ed teritorya yo a nakimeyan legan na Abril, a singa saray airport, ospital, paradaan, parke, tan panagbakasyonan ya abung. Saray ulop na mamatatken so nepeg a manetermina no antoran matukoy ya uksoyan so nayarin gawaen parad panagtasi ed sarayan lugar a teritorya na kongregasyon yo.
11 Si Jehova et sakey ya agnakekesawan a komikimey. (Juan 5:17) Pinalsa toy katawenan tan dalin ontan met ed saray tanaman tan ayayep; balet intultuloy toy mankimey anggad ayari ton pinalsay sankatalonggaringan ya agawaan ed dalin, salanti, say too. Say katuaan a walaan itayo na bilay et direktan resulta na inkamabulos na Dios a mankimey. Bilang ‘omaalig ed Dios,’ nepeg a napakiwas itayo na aro tayo ed sikato a magmaliw a “mapaga [odino, maseseg] ed saray maabig a gawa.” (Efe. 5:1; Tito 2:14) Lapud si Jehova et makanepegan a mangawat na sankaabigan a sagpot tayo tan lapud say pilalek tayon makagamor na saray resulta et pakapatnagan na inkaseseg, nepeg a magmaliw itayon interesado ed panggawa na de-kalidad a kimey ed ministeryo. Siempre, aapresyaen nen Jehova so dinanman a sakripisyon gagawaen tayo parad sikato, tan say kimey tayo et agbalot andian na kabaliksan. (1 Cor. 15:58) Kanian, tekep na misalsalamat a kapusoan, pampelengan tayoy magmaliw a maseseg ed aktibidad legan na Abril, a matalek ed abobon tan bendisyon nen Jehova tan ed daakan ya itatalona!