Saray Sankaliketan a Totoo ed Dalin
1 “Maliket so totoo a say Dios da et si Jehova!” (Sal. 144:15, NW) Saratan a salita so manideskribe ed Tastasi nen Jehova bilang sankaliketan a totoo ed dalin. Anggapo lay babaleg nin gayaga nen say diad panlingkor ed alenleneg a tua tan mabilay a Dios, si Jehova. Lapud sikatoy “maliket a Dios,” saraman so mandadayew ed sikato so mangipapatnag ed liket to. (1 Tim. 1:11, NW) Antoray pigaran aspekto na panagdayew tayo a mamaliket a tuloy ed sikatayo?
2 Saray Rason ed Pagmaliw a Maliket: Pinaseguroan itayo nen Jesus a say liket so manlalapud pagmaliw tayon “sinononot ed espiritual a pankaukolan [tayo].” (Mat. 5:3, NW) Say pantultuloy a panaral ed Biblia tan iyatendi ed amin a Makristianon pantitipon tayo so mamepenek ed sayan pankaukolan. Say pakakaaral ed katuaan na Salitay Dios so mangibubulos ed sikatayo manlapud relihyoson katilaan tan lingo. (Juan 8:32) Ibabangat met ed sikatayo na Kasulatan so sankaabigan a dalan na panagbilay. (Isa. 48:17) Lapud satan, panggagayagaan tayo so makapaseseg a Makristianon pantutuyaw diad maliket a panlilimog tayo bilang sanaagi.—1 Tes. 2:19, 20; 1 Ped. 2:17.
3 Nagagamoran tayo so inkakontento diad itutulok ed atagey iran estandarte na Dios ed moral, lapud amta tayo a saya so manasalimbeng ed sikatayo tan mamapaliket ed si Jehova. (Uli. 27:11) Inkuan na sakey a reporter na peryodiko: “Anggaman ed mapeget iran estandarte ra, saray Tastasi nen Jehova so aliwan maermen. Diad kasunian. Napatnagan ed saray kalangweran ontan met ed saray maedad la [ed limog da] a sikaray nikadkaduman magayaga tan asimbang a maong.” Panon tayon natulongan so arum a nawalaan met na maliket a paraan na bilay?
4 Tulongan so Arum a Makaromog na Liket: Say mundo so napno na kaermenan, tan saray totoo ed inkalapagan so walaan na mauddiem a panmoria ed arapen. Anggaman ontan, walaan itayo na masnag a panmoria, a kabat tayo a nasabi panaon et amin a kaermenan so naandi la. (Apoc. 21:3, 4) Sirin, maseseg itayon mibibiang ed ministeryo, ya anapen iray matuan impanpuso a panginabangan tayo na ilalo tan saray sisiaen tayo nipaakar ed si Jehova.—Eze. 9:4.
5 Inkuan na sakey ya agin bii a payunir: “Anggapo lay mas makapenek nen say panulong ed totoo a nakabat si Jehova tan say katuaan to.” Gawaen tayo sirin so anggaan na nayarian tayo pian pasesegen so dakel ni a mangawat na saray panangiyaral ed Biblia. Say panlingkor ed si Jehova tan say mabulos tayon panulong ed arum a manlingkor ed sikato so mamawala na pirmin liket.—Gawa 20:35.