Saray Pakabat

◼ Opresin literatura ed Marso: Say libron Pikakabat so iyopresi tan panggunaetan a nigapo iray panangiyaral na Biblia. Abril tan Mayo: Sansakey iran kopya na Say Panag-Bantayan tan Awake! Diad saray panagpawil, nayarin iyopresi na saray manangipalapag so regular a pangitulor ed saray magasin, tekep na kalat a nigapoy panangiyaral na Biblia. Hunyo: Iyopresi so balon libro ya Onapit ed si Jehova.

◼ Onggapo ed Abril, saray manangasikaso na sirkito so manpaliwawa ed publiko ed teman “Alwaran Yoy Pakabidbiran Yo Bilang Kristiano!” sano ombisita ed saray kongregasyon.

◼ Saray manangipalapag a malabay a man-auxiliary payunir no Abril tan Mayo so kaukolan a manplano la natan tan iter da lan masakbay iray aplikasyon da. Ontulong iya ed saray mamatatken pian makapanggawa ira na nakaukolan iran uksoyan parad lawak a serbisyo tan pian makala ira na magenap a suplay na saray magasin tan arum nin literatura. Kaukolan ya iyanunsyo ed kongregasyon so kangaranan na saramay naaprobaan bilang auxiliary payunir.

◼ Lapud intunda la so uksoyan parad personal iran subskripsion panamegley na koreo, importante ya ipaway lan tampol na saray kongregasyon iray sankabaloan ya isyu na Say Panag-Bantayan tan Awake! kapangawat da ed saratan. Diad ontan et nawalaan la na personal iran kopya iray manangipalapag tan nakabisado ra so lugan na saray magasin antis dan iyopresi iratan diad lawak na kimeyan.

◼ Panagbasa ed Biblia Legan na Memoryal: Amin so papasesegen a manbasa ed nisuherin porsyon na Biblia ya akaeskedyul ed 2003 Calendar tan diad Usisaen so Kasulatan ya Inagew-agew, ya onggapo no Abril 11 tan manampot ed agew na Memoryal, Abril 16.