Paneknek na Mabiskeg a Pananisia!

1. Antoran makapagonigon a nagawa so impasakbay nen Jesus?

¹ Dinmengel a maong iray apostol legan a mansasalita si Jesus nipaakar ed kiwawala to tan say kabiangan na anggaan na sistema na bengabengatla. Inkuan nen Jesus a sagmaken na katooan iray makapagonigon a nagawa​—saray guerra, kakulangan na tagano, yegyeg, salot. Insan saray papatumbok to so busolen, pairapen, tan pateyen. Onlesa iray palson propeta tan ibalang da so dakel. Tan ombetel so aro na karaklan.

2. Akin a makatantanda a say maong a balita et nipupulong ed sankamundoan?

² Lapud saratan a nagawa, seguradon abigla iray apostol sanen inkuan nen Jesus a say maong a balita na Panarian na Dios et nipulong ed interon dalin. (Mat. 24:3-14) Nanenengneng tayo natan so makatantandan kasumpalan na satan a makapaliket a propesiya. Anggaman manbibilay itayo la ed mapeligron panaon, maseseg ya ipupulong tayo ran Tasi nen Jehova so maong a balita. Legan ya ombebetel so aro na mundo, say aro tayo so lalon ompepetang. Anggaman bubusolen itayo na “amin a nasyon,” makapanpupulong itayo ed ngalngali amin lan nasyon.

3. Antoran makapaseseg a bilang so nanengneng yo ed sankamundoan a report?

³ Agaylan makapaseseg so panrepaso ed kimey na saray Tasi nen Jehova legan na apalabas a serbisyon taon unong a nanengneng ed tsart ed pahina 3 anggad 6! Diad nantutumbokan a labin-anem a taon, masulok a sakey bilyon ya oras so nausar ed panagpulong tan panaggaway babangatan. Agaylan paneknek na mabiskeg a pananisia itan! Wala so intagey a 5.8 a porsiento ed bilang na saray payunir, 3.1 a porsiento ed manangipalapag, tan 4.4 a porsiento a panangiyaral na Biblia. Say bautismo et tinmagey na 20.1 porsiento ed apalabas a serbisyon taon. Makapaliket so pakanengneng ed ngalngali pitoran milyon a totoo a matoor a manlilingkor ed si Jehova​—a mas dakdakel natan nen say nensaman! Legan yon uusisaen so tsart, anto so naimano yon nagkalautlan makapaseseg ed sikayo?

4. Antoran problema so atalonaan na sakey a laki legan ton pampepelengan so pampabautismo?

⁴ Anggaman makapadinayew so kinarakel, agtayon balot lilingwanan ya irerepresenta na saratan a bilang so totoo ya amaneknek ed pananisia ra. Konsideraen so sakey ya alimbawa. Si Guillermo so binmaleg ed Bolivia. Nianak nen 1935, tan manlapud edad ton siamera et sikatoy nantrabaho ed taneman na gagal a tatawagen a coca. Manlapud inkaugaw to, sikatoy nan-gagal na bulong na coca pian natempey so irap tan banal na panagtrabaho. Ag-abayag, sikatoy nagmaliw a mainum tan masigarilyo. Sanen naaralan nen Guillermo so nipaakar ed kakaukolanen nen Jehova ed sikato, intunda to so panagsigarilyo tan alabas a panag-inum na alak. Say sankairapan ya intunda to et say binalegan to lan panag-gagal na bulong na coca. Sikatoy agtinmundan nampikasi tan atalonaan to itan. Lapud inekal to la iray bisyo to, sikatoy abautismoan. Inkuanto, “malinis tan malikeliket ak la natan.”

5. Antoy pilalek yo?

⁵ Talagan interesado si Jehova ed totoo. Pilalek to ya amin et magbabawi. (2 Ped. 3:9) Ontan met so pilalek tayo. Komon ta say kapusoan tayo so mamakiwas ed sikatayon gawaen so anggaan na nayarian tayo a tulongan iray matuan impanpuso a makapikabat tan mangaro ed si Jehova a singa sikatayo.