Saray Pakabat

◼ Opresin literatura ed Mayo: Publikon edisyon na Watchtower katekep na Awake! Sano pawilen iray interesado, nonoten lawas so pangigapo na panangiyaral na Biblia ya usaren so libron Ibabangat na Biblia. Hunyo: Anto so Peteg ya Ibabangat na Biblia? Panggunaetan so pangigapo na saray panangiyaral na Biblia. Hulyo tan Agosto: Nayarin iyopresi so dinanman a brosyur.

◼ Diad ontumbok a pigaran bulan et ipawitan mi kayo na saray form a kaukolan na kongregasyon legan na ontumbok a serbisyon taon. No wala niray arum a form a nakaukolan yo, nayarin orderen iraya a singa dati, ya usaren so Literature Request Form (S-14). Saray form ya ipawit et anggapoy bayar, balet seguradon labay na saray kongregasyon so mangiter na magenap a kontribusyon parad sankamundoan a kimey a makatulong ed gastos ed impangimprinta tan impangipawit. Ipangasin imanoen a saray badge card parad 2008 a Distrito iran Kombension so ilaktip ed ipawit iran form, kanian agla kaukolan ya orderen ni iraya likud no naimano yon kulang so impawit mi ed sikayo. Balet, kaukolan yon orderen so plastik na badge diad pangusar ed S-14 a form.

◼ Saray ulop na mamatatken so nepeg a manrepaso ed sulat a Hulyo 6, 2006, nipaakar ed pagmaliw ya akaparaan ed kalamidad tan seguroen da no anto so peles ya address tan pakatuplegan ed kada manangipalapag. Diad saray lugar a mabetbet a nadalan na kalamidad, kaukolan so kaaruman ya impormasyon a pakatuplegan no walay emerhensia. Siempre, nilikud ni ed emerhensia iran situasyon, makatulong no pakabatan na saray manangipalapag so manangasikaso da ed Panagaral na Kongregasyon ed Libro odino arum nin matatken no bilang ta mabayag ya anggapo ira ed kongregasyon, a singa say pambakasyon odino lapud trabaho, sano naospital, tan arum nira.

◼ Ta pian naseguro so seguridad na Kingdom Hall, say unor ya onalis so nepeg a mangitalak ed puerta tan arum nira. No agto sarag ya italak itan, sikatoy manawag na sakey a makasarag tan alagaren ton onsabi antis ya onalis. Saray mamatatken so kaukolan a walaan na dugan listaan na saray responsablin manangipalapag ya inikdan na tumbok na Kingdom Hall.

◼ Balon MP3 a Naala:

Saray Drama a Nibase ed Biblia​—Ingles (Karga na sakey a disc so 14 ya audio drama, a dati et walad sansakey ya audiocassette tan CD.)