“Gala Magmaliw Kan Patumbok Ko”
1. Anto so niwalan pankanawnawa diad Panagaral na Kongregasyon ed Biblia no ontumbok a bulan?
1 Detalyadon deneskribe na apatiran Ebanghelyo so impanbilay nen Jesus sanen sikatoy wadiad dalin. Lapud ‘tutumboken a maapit [na saray Kristiano] iray bakat to,’ labay tayoy manparaan tan ontalineng a maong legan tayon aralen so libron “Gala Magmaliw Kan Patumbok Ko,” diad Panagaral na Kongregasyon ed Biblia ya onggapo ed simba na Marso 1. (1 Ped. 2:21, NW; Mar. 10:21) Importantin ikonsidera tayo iray aspekto na bilay nen Jesus a mamaseseg ed sikatayo diad ministeryo.
2. Panon itayon minabang ed ehemplo nen Jesus?
2 Ehemplon Inletneg nen Jesus: Kasin wala lay akatongtong yo’d panagkabkaabungan ya angipanengneng na negatibon reaksion? Sano makaabet itayo na ontan iran isusumpa, napaneknekan tayon tua imay imbaga nen Jesus: “No pinasegsegang da ak, pasegsegangen da kayo met.” (Juan 15:20) Tua, aliwan panamasegsegang so amin a negatibon reaksion. Balet, say gayagan niiyan ed arap nen Jesus so makasengeg no akin ya asungdoan toy amin a nengneng na subsubok tan irirap. Nisentro tayo met so imano tayo ed pakagamor na panangabobon nen Jehova tan say tumang lapud katooran tayo. Ontulong iya ed sikatayo pian ‘agnakesawan tan ag-onkapuy so linawa tayo.’ (Heb. 12:2, 3, NW; Uli. 27:11) Legan tayon mansiasiansia ed ministeryo, makapanmatalek itayo ed tulong nen Kristo Jesus.—Mat. 28:20.
3. Panon tayon naalig so panmoria nen Jesus ed ministeryo?
3 “Saya so Angibakian ed Siak”: Say panangipulong na Panarian so manunaan a kimey ed bilay nen Jesus. (Luc. 4:43) Mabulos ton inter so inkasikato ed ministeryo. Impasen to ya apuraan itan, a lawas ton aanamoten iray pankanawnawa pian nipasabi so nipaakar ed Panarian. Lapud ta papatumbok itayo nen Jesus, iner so pangipapaarapan ed sikatayo na saray bakat to? Legan tayon gagawaen iray inagew-agew a kimey tayo, walara kasi totoon napanginabangan tayoy maong a balita? Komon ta say aro nen Kristo so mamakiwas ed sikatayon gawaen so anggaay nayarian tayo a ninabang so maong a balita!—2 Cor. 5:14.
4. Panon tayon napaaligwas so kalidad na ministeryo tayo?
4 “Anggapo ni Too a Nansalita na Onia”: Pandinayewan na saray dumerengel so panagbangat nen Jesus. (Juan 7:46; Mat. 7:28, 29) Akin a sikatoy miduma ed arum a managbangat? Lapud inaro toy katuaan ya imbangat to, saray totoon binangatan to, tan sikatoy angusar na pigaran metodo ed panagbangat. Diad pangalig tayo ed Sankamaongan a Managbangat, napaaligwas tayoy kalidad na ministeryo tayo.—Luc. 6:40.
5. Anto so nepeg a kalat tayo legan tayon aralen so “Gala Magmaliw Kan Patumbok Ko”?
5 Saraya so pigara labat ed saray “kayamanan” a niparungtal ed bilay nen Jesus. Antoray arum nin kayamanan a nagamoran tayo? Legan yon aralen so impanbilay nen Jesus diad Panagaral na Kongregasyon ed Biblia, gawa yon kalat a “nakabatan [so] aro nen Kristo” diad pangalig ed saray salita tan gawa to.—Efe. 3:19.