Saray Pakabat

◼ Opresin literatura ed Pebrero: Say Sekreto na Liket ed Pamilya odino The Bible​—God’s Word or Man’s? Marso: Anto so Peteg ya Ibabangat na Biblia? Abril tan Mayo: Saray magasin a Panag-Bantayan tan Awake! Sano pawilen iray interesado odino saramay inmatendi ed Memoryal, iyopresi so libron Ibabangat na Biblia diad gagalan makapangigapo na panangiyaral na Biblia.

◼ Nepeg a repasoen na sekretaryo tan manangasikaso na serbisyo so kimey na amin a regular payunir diad katapusay Pebrero. No walaray nanairapan a makaabot ed kakaukolanen ya oras, manggawa na uksoyan iray elder pian natulongan iray payunir a naala so tinaon a kakaukolanen ya oras sakbay na Agosto 31, 2010.

◼ Kayari Panagaral na Panag-Bantayan no Simba, Pebrero 14, 2010, walay antikey a miting na amin a manplaplanon man-auxiliary payunir ed bulan na Marso, Abril, tan Mayo. Ikondukta itan na manangasikaso na serbisyo, tan seguroen a walay magenap a kopya na Application for Auxiliary Pioneer Service ya ibunog ed amin ya onatendi.