Manliket a Maong ed Kimey Mo
1. Antoy nayarin mamakapuy na seseg tayod ministeryo?
1 Pinalsa so too pian “manliket a maong ed kimey to.” (Ecl. 2:24) Balet, no ibaliwala tayo iray maong a resulta na ministeryo tayo, nadismaya tayo tan sengegan itan na pakaandi liket tan seseg tayo. Antoy ontulong ed sikatayon napansiansiay positibon panmoria?
2. Akin a nepeg a realistiko iray iilaloan tayod reaksion na totoo ed ministeryo tayo?
2 Magmaliw a Realistiko ed Saray Iilaloan Tayo: Tandaan ya anggaman daiset labat iray dinmengel ed si Jesus, siansian epektiboy ministeryo to. (Juan 17:4) Diad samay ilustrasyon nen Jesus nipaakar ed sakey a tomatanem, imbaga ton dakel so agmangawat ed mensahe na Panarian a niyaliling ed bukel. (Mat. 13:3-8, 18-22) Anggaman ontan, baleg so nagawaan na sagpot tayo.
3. Panon itayon ‘manbunga’ anggano daiset iray ondedengel ed ipupulong tayo?
3 No Panon Tayon Manbunga na Dakel: Unong ed samay ilustrasyon nen Jesus, saramay angawat na mensahe et ‘manbunga.’ (Mat. 13:23) Sano ontubo tan ontatken lay trigo, ag-itan mamawalay angkelag a dawa, noagta balon bini. Kanian say bunga na saray Kristiano et aliwan balon babangatan, noagta say dakerakel a nitanem a bini na Panarian lapud pampupulong tayo. Manresulta iyad “maong” a bengatlan mamaliket ed sikatayo, ondengel man odino andi iray totoo. Ontan met, napapasanto tayoy ngaran nen Jehova. (Isa. 43:10-12; Mat. 6:9) Papablien tayoy pribilehyo bilang kakimeyan na Dios. (1 Cor. 3:9) Tan saratan a “bunga na saray bibil” et mamaliket ed si Jehova.—Heb. 13:15, 16.
4. Anto ray nayarin resulta na ministeryo tayo ya agtayo naam-amtaan?
4 Sakey ni, nayarin agtayo naam-amtaan a saray sagpot tayo et walaay maabig a resulta. Posiblin arum ed saray apulongan nen Jesus et nagmaliw labat a disipulo to kayari na ministeryo tod dalin. Ontan met, saray bini na Panarian ya intanem tayo et nayarin agtampol onlamot tan ontubo ed puso na sakey a too, tan awaten toy katuaan ya agtayo naam-amtaan. On, baleg so nagawaan na ministeryo tayo. Kanian, “mantultuloy [tayon] manbunga na dakel” tan paneknekan a disipulo itayo nen Jesus.—Juan 15:8.