Alig Yoy Alimbawa na Saray Propeta—Amos
1. Akin ya makapaseseg ed sikatayo so alimbawa nen Amos?
1 Kasin say pakaliknam no maminsan et aliwa kan kualipikadon manpulong ta iisipen mon abebay aral mo o mairap so bilay mo? No ontan, napaseseg kad alimbawa nen Amos. Sikatoy sakey a managpastol tan panapanaon et mankikimey ed uma, balet pinabiskeg nen Jehova pian iyabawag so importantin mensahe. (Amos 1:1; 7:14, 15) Ontan met natan, uusaren nen Jehova iray mapaabeba. (1 Cor. 1:27-29) Diad ministeryo tayo, anto ni ray naaralan tayod si propeta Amos?
2. Akin et makapanpakpel tayo anggano susumpaen ed ministeryo?
2 Manpakpel Anggano Susumpaen: Sanen si Amasias a saserdoten mandadayew ed kilaw a baka et nadngel toy propesiya nen Amos, singa to imbagan: ‘Sempet ka la! Agmo kami pibabalian! Wala lay sarili min relihyon!’ (Amos 7:12, 13) Pinikewet nen Amasias so imbaga nen Amos sanen kinerew tod si Arin Jeroboam ya sebelay kimey na propeta. (Amos 7:7-11) Balet agtinmakot si Amos. Diad panaon tayo, wala ray papari ya manusugsog ed gobierno pian pasegsegangen iray totoo nen Jehova. Balet, ipapaseguro nen Jehova ya anggapoy armas ya makapatunda ed sikatayo.—Isa. 54:17.
3. Anton duaran mensahe so iyaabawag tayo natan?
3 Iyabawag so Panangukom na Dios tan Saray Bendisyon ed Arapen: Anggaman impropesiya nen Amos so pangukom ed samploran tribu na Israel, diad sampot na libro na Biblia ya akangaran ed sikato et insulat toy nipaakar ed sipan nen Jehova ya kipawil tan saray dakel a bendisyon. (Amos 9:13-15) Ipupulong tayo met natan so isabi na “agew na panangukom” na Dios, balet kabiangan labat itan na “maong a balita na panarian” ya kaukolan tayon iyabawag. (2 Ped. 3:7; Mat. 24:14) Say paneral nen Jehova ed saray mauges diad Armagedon so gapoan pian magmaliw a paraiso so dalin.—Sal. 37:34.
4. Panon tayon amta ya nasumpal tayoy linawa nen Jehova?
4 Legan tayon ipupulong so mensahe na Panarian diad mundon dakel so onsusumpa, seguradon nasubok so determinasyon tayon toorey dedikasyon tayod si Jehova tan say panggawad linawa to. (Juan 15:19) Balet, segurado tayo ya itultuloy nen Jehova ya pagmaliwen itayon kualipikado pian nasumpal so linawa to, a singa ginawa tod si Amos.—2 Cor. 3:5.