Siopa Ray Manggagawa na Linawa nen Jehova Natan?
1. Kapigan tayo igapon aralen so Siopa Ray Manggagawa na Linawa nen Jehova Natan? tan panon tayon nagunggonaan ed saya?
1 Onggapo ed simba na Oktubre 28, aralen tayo so Siopa Ray Manggagawa na Linawa nen Jehova Natan? diad Panagaral na Kongregasyon ed Biblia. Sayan balon brosyur ya in-release ed “Protektaan Moy Pusom!” a Distriton Kombension so ontulong pian niwanwan ed organisasyon iray iyaaralan na Biblia. Diad panaral ed sayan publikasyon, lalo tayon naapresyay pagmaliw a kabiangan na organisasyon nen Jehova tan nakabisado tayo iyan uusaren ed ministeryo.—Sal. 48:13.
2. Panon ya aralen iyan brosyur diad kongregasyon?
2 No Panon Iyan Aralen: Kaukolan ya apag-apagen na manangikondukta so oras pian nakobrian so kada leksion. Kada sakey ed 28 leksion et igapo to diad pangitepet ed title. Insan kerewen tod managbasa ya basaen so introduksion. Kayari na satan, itepet na manangikondukta so imparaan ton tepet parad introduksion. Insan sansakey a basaen tan pantongtongan iray parapo ya onggagapod mabakat iran salita. Kayarin abasa so parapo, mantepet so manangikondukta no panon ya eebatan na satan a parapo so title. Dakel met so litrato ed brosyur ya nayarin komentoan. No wala ni oras, nepeg a basaen iray teksto. Antis ya onlad onsublay ya leksion, irepaso na manangikondukta iray tepet diad leksab na pahina. Tan no walay kahon ya “Salim Iyan Gawaen,” ipabasa to itan tan tepetan to iray dumerengel no panon ya nagunggonaan so iyaaralan na Biblia ed satan ya suhestion. Diad sampot na panagaral, nayarin itepet lamet na manangikondukta iray title na leksion bilang repaso. Tandaan, agto labay ya ibagan onia met so gawaen sano iyaral iyan brosyur.
3. Panon tayon nagunggonaan diad panaral ed sayan brosyur?
3 Nagunggonaan tayo no manparaan tayon maong antis ya miaral. Maabig no mankomento tayo. Legan na panagaral, isipen no akin ya makagunggona iya ed saray iyaaralan ed Biblia. Komon ta say panaral tayod sayan balon brosyur et mamaseseg ed sikatayon ontulong ed arum pian mibiang irad panggawa na linawa na Dios tan nawalaan met na ilalon manbilay ya andi-angga.—1 Juan 2:17.