Pangikondukta na Epektibon Panangiyaral na Biblia
1. Anto so responsabilidad na saray manangipalapag ya mangiyaaral na Biblia?
1 Anggapoy makapanlingkor ed Dios likud no sikatoy ‘iyasingger’ nen Jehova. (Juan 6:44) Balet siansia nin kaukolan ya gawaen na saray manangipalapag a mangiyaaral na Biblia so betang dan tulongan iray totoo ya onapit ed Ama dad tawen. (Sant. 4:8) Kaukolan ed saya so pamparaan. Aliwan magenap so pambasa labat na saray parapo tan akasulat ya tepet pian natalosan na iyaaralan so mensahe na aaralen to tan onaligwas.
2. Antoy resulta na epektibon panangiyaral na Biblia?
2 Pian makapangikonduktay epektibon panangiyaral, nepeg ya tulongan na manangipalapag so iyaaralan to ya (1) natalosan so ibabangat na Biblia, (2) panisiaan so ibabangat na Biblia, tan (3) iyaplika so ibabangat na Biblia. (Juan 3:16; 17:3; Sant. 2:26) Nayarin kaukolay pigaran bulan pian nagawaan irayan kundang. Balet kada sakey ed saratan et mangipapatnag ed iyaaligwas na relasyon tod si Jehova ya anggad idedika toy bilay to.
3. Akin ya say epektibon managbangat et manguusar na tepet ya pannonoten toy iyaaralan?
3 Antoy Nononoten na Iyaaralan?: Pian nanengneng no kasin say iyaaralan tayo et natatalosan tan panisiaan toy naaaralan to, nepeg ya aliwan sikan lanang so mansasalita tan paseseg mon ibalikas toy walad nonot to. (Sant. 1:19) Kasin natatalosan toy ibabaga na Biblia ed topic ya aaralen yo? Sarag to kasin ipaliwawa itan unong ed atalosan to? Antoy nibaga tod naaralan to? Kasin panisiaan to ya makatunongan so ibabangat na Biblia? (1 Tes. 2:13) Kasin natatalosan ton kaukolan toy manggawa na pananguman ed kabibilay to base ed naaaralan to? (Col. 3:10) Pian naamtaay ebat ed saraya, kaukolan tayoy mangusar na mataktika iran tepet ya pannonoten toy iyaaralan insan dengelen so ebat to.—Mat. 16:13-16.
4. Antoy gawaen tayo no naiirapan so iyaaralan ya talosan odino iyaplika so bangat na Biblia?
4 Kaslakan, saray apasalan lan kagagawa tan panagnonot et aliwan mainomay ya umanen. (2 Cor. 10:5) Panon to no say iyaaralan et agto panisiaan odino agto iyaaplikay nanaaralan to? Importante so pananos ta kaukolay magenap a panaon pian pakiwasen na Salita na Dios tan na masanton espiritu so puso na iyaaralan. (1 Cor. 3:6, 7; Heb. 4:12) No naiirapan so iyaaralan ya talosan odino iyaplika so sakey a bangat na Biblia, imbes ya ipilit ni itan, mas maabig no onla lad arum a topic. Diad maanos tan maaron pangibabangat tayoy Biblia ed sikato, nayarin onsabi panaon ya napakiwas a manggawa na saray pananguman.