Mantultuloy ya Onaligwas Bilang Ministro
1. Anto ray alimbawa nensaman ya mangipapanengneng a kaukolan tayoy onaligwas bilang ministro?
1 Saray Kristiano et nepeg ya onaligwas bilang ministro. Kanian impasal nen Jesus iray papatumbok to pian napaaligwas iray abilidad da. (Luc. 9:1-5; 10:1-11) Satan met so rason no akin ya impila nen Aquila tan Priscila si Apolos tan “impaliwawa ra ed sikato so dalan na Dios ed mas suston paraan.” (Gawa 18:24-26) Ontan met, pinaseseg nen Pablo so eksperiensyadon ebanghelisador ya si Timoteo ya itultuloy toy manseet ed panagbangat to, pian say iyaaligwas to et “nanengneng na amin a totoo.” (1 Tim. 4:13-15) Anggan panon kabayag ti lan manlilingkor ed Katawan bilang manangipalapag na maong a balita, kaukolan tayon tuloytuloy ya paaligwasen so abilidad tayod panagpulong.
2. Panon tayon makaaral ed arum?
2 Makaaral ed Arum: Pian onaligwas so abilidad tayo, makatulong no makaaral tayod arum. (Uli. 27:17) Kanian ondengel tayo no mitotongtong ed unabung so kaulop tayo. Onkerew tayo na espisipiko iran suhestion ed saray manangipalapag ya epektibod panagpulong, tan dengelen ya maong so ibaga ra. (Uli. 1:5) Kasin agmo kabisadoy man-RV, mangigapoy panangiyaral na Biblia, odino mibiang ed arum nin paraan na panagpulong? Maabig no sika lay onasingger ed manangasikaso na grupo yo odino ed sakey ya eksperiensyadon manangipalapag pian paipasal. Tandaan met ya sarag na masanton espiritu nen Jehova ya paaligwasen iray abilidad mo, kanian kerew mon naynay itan ed pikakasi.—Luc. 11:13.
3. Antoy nepeg ya reaksion tayo no walay mangiter ed sikatayo na suhestion anggan agti met kekerewen?
3 Agka nasasakitan no walay mangiter ed sika na suhestion anggan agmo met kekerewen. (Ecl. 7:9) Singa si Apolos, mapaabeban awaten tan pisalamatan itan. Say panggawad satan et pangipanengneng na karunongan.—Uli. 12:15.
4. Unong ed si Jesus, antoy mabiskeg a rason no akin ya kaukolan tayoy onaligwas bilang ebanghelisador?
4 Nigloria so Dios ed Iyaaligwas Tayo: Diad panamegley na ilustrasyon, pinaseseg nen Jesus iray papatumbok to ya onaligwas bilang ministro. Inyaliling toy sarili tod sengeg na ubas, tan saray alanaan ya papatumbok to ed saray sanga. Imbaga ton lilinisan na Ama so balang sanga ya manbubunga “pian manbunga itan na mas dakel.” (Juan 15:2) Labay na akanggawa na ubasan ya mas dakel so bunga na saray sanga na ubas to, ontan met, labay nen Jehova ya tuloytuloy ya onaligwas so abilidad tayon mamawalay “bunga na saray bibil tayo.” (Heb. 13:15) Antoy makapaliket ya resulta no onaaligwas tayo bilang ebanghelisador? Oniay ebat nen Jesus: “Say Amak et nigloria no mantultuloy kayon manbunga na dakel.”—Juan 15:8.