Manbangat ya Usaren so Brosyur ya Maong a Balita
1. Panoy inkagawa na brosyur ya Maong a Balita?
1 Singa inaral tayod Hulyo ya isyu na Ministeryo Tayo ed Panarian, say sakey ya importantin kagawaan tayod panagbangat et say brosyur ya Maong a Balita ya Nanlapud Dios! Ag-insulat so karga na basaen iran teksto pian panliketan na unabung so manaral ya direktad Biblia. Dakel ed saray publikasyon tayo so ginawa ya sarag na sakey ya aralen iratan a bukor, balet say inkagawa na sayan publikasyon et kaukolan ya walay manbangat. Kanian no iyopresi tayo iya, idemostra tayo no panon so panaral pian nanengneng na unabung ya makapalikliket ya aralen so maong a balita ya manlapud Biblia.—Mat. 13:44.
2. Panoy nayarin pangusar tayod brosyur ya Maong a Balita diad unonan pitongtong?
2 Diad Unonan Pitongtong: Nayarin ibagam: “Ombibisita kami lapud dakel so totoon napapagaan no anto la kasi nagawad mundo. Parad sikayo ondakep ni kasi situasyon na mundo? [Abuloyan ya onebat.] Walay ibabaga na Biblia ya maong a balita ya mangiter ed sikatayoy ilalo. Nia ray pigaran tepet ya eebatan na Biblia.” Iderew ed unabung so brosyur tan pampilien ed saray tepet ed beneg. Insan ipanengneng no panoy panagaral, ya usaren so unonan parapo ed satan a leksion. Say sakey nin nayarin gawaen et tepetan so unabung na paninteresan to base ed leksion ya pilien mo, insan ipanengneng no panon ya makatulong so brosyur pian naanap toy ebat ed Biblia. Wala ray manangipalapag ya mangipapabantay na video ed jw.org ya mitukoyan ed satan a leksion no manpupulong ira.
3. Ipaliwawa no panon ya nayarin iyaral so brosyur ya Maong a Balita.
3 No Panon ya Iyaral: (1) Basaen so mabakat a tepet ya walay numero, pian ontulong ed unabung ya manpokus ed sakey a punto. (2) Basaen so parapo. (3) Basaen iray tekston aka-italiko, tan mataktikan mantepet pian natalosan na unabung no panon ya eebatan na teksto so tepet ya walay numero. (4) No aliwan saksakey so parapo ed sakey ya tepet, uliten so step 2 tan 3 ed kada parapo. No walay mitukoyan a video ed satan a tepet tan agyo ni nipabantay, ipabantay iya legan na panagaral. (5) Kayari to, paebatan ed too so mabakat ya tepet pian naseguro no kasin atalosan to.
4. Antoy gawaen pian marundunong ya nausar iyan brosyur?
4 Kabisadoen iyan importantin uusaren tayod panagbangat. Naynay yan usaren no matukoy. Antis ya mangiyaral, isipen no antoy sankaabigan ya pikatunongan ed kada iyaaralan, ya usaren iray teksto ed leksion. (Uli. 15:28; Gawa 17:2, 3) No naynay mon uusaren tan napasal ka la, ompan sakey la yan paboritom ya kagawaan ya usaren pian ibangat so katuaan ed totoo!