Tinulongan Kami nen Jehova ya ‘Ombuna Diad Dalin ya Angitaneman To ed Sikami’

Nanaral ed Gilead School si Mats tan Ann-Catrin nen 1979, tan diad inlabas na saray taon, “intanem” odino inyasain iran manlingkor ed nanduruman lugar—diad Iran, Mauritius, Myanmar, Tanzania, Uganda, tan Zaire. Say instruktor dad Gilead ya si Jack Redford so angibagad klase da ya, “Pansagpotan yoy ombuna diad dalin ya angitaneman ed sikayo.” Balbaleg kunoy nitulong to ’tan ya advice pian mansiansia ran maliket ed asainmin da anggano aminpiga ran “binagot” tan “intanem lamet.” Amtaen tayoy istorya da.

Istorya yo pad sikami no panon yon nalmoy katuaan.

Mats: Manaayam ed Poland si tatay ko nen World War II, tan adisdismaya ra nen anengneng day pansimpisimpitan na saray Katolikon pari. Pero say lanang dan ibabaga, “Andi bale ta naromog tayo lanlamang so tuan relihyon.” Kalabas na panaon, aromog ko itan! Mahilig ak ya mangaliw na secondhand ya libro, tan sakey ed saray asaliw ko et amay asul ya libro ya say title to et The Truth That Leads to Eternal Life. Nen anengneng ko may title to, apaisip ak kanian binasak may interon libro diad saman lanlamang ya labi. Kaimbuasan to man, amtak ya nalmok lay tuan relihyon!

Manlapu nen Abril 1972, dakel ni binasak ya publikasyon na Saray Tasi nen Jehova, tan naebatan iray tepet ko. Singa ak samay negosyante ed ilustrasyon nen Jesus ya nen akalmoy mabmablin perlas et inlako toy amin ya walad sikato tan sinaliw to itan. Diad saman et planok la komoy manaral ed unibersidad ta labay koy magmaliw ya doktor, pero “inlakok” itan pian nasaliw ko so nalmok ya katuaan. (Mat. 13:​45, 46) Nampabautismo ak nen Disyembre 10, 1972.

Kalabas na pigaran bulan, nampaiyaral met na Biblia iray atateng ko tan samay agik ya laki, tan abautismoan met ira. Nen Hulyo 1973, nan-regular payunir ak la. Walay maganggana tan maespiritual ya sister ya payunir met ed kongregasyon mi, si Ann-Catrin. Masetseseg iyan sister. Agusgustoan tan apakpaknaan mi sakey tan sakey. Nankasal kami nen 1975. Kayari na kasal mi, apat taon kamin nampayunir diad baley na Strömsund. Marakdakep itan ya lugar diad Sweden tan dakel so interesado ed Biblia.

Ann-Catrin: Naamtaan nen tatay ko so katuaan nen manaaral ira ed unibersidad ed Stockholm. Baby ak ni labat ed saman pero ipipila da ak lad saray aral tan diad panagpulong. Aglabay nen nanay ko iray Tasi, kanian labay dan paneknekan ya aliwan tuay ibabangat da. Pero agda met lanlamang napaneknekan kanian nampabautismo met ira. Nen 13 so taon, nampabautismo ak, tan nampayunir ak nen 16 ko la. Tinmulong ak ed lugar ya daiset labat so Tasi, diad syudad na Umeå, tan ditan ak nagmaliw ya espisyal payunir.

Kayari min nankasal nen Mats, malikeliket kami ta wala ray inyaralan mi na Biblia ya angawat ed katuaan. Walay inyaralan mi ya tinedyer ya bii ya say ngaran to et Maivor. Marundunong ed sports si Maivor tan wala komoy tsansa ton onsikat. Pero tinaynan toy sports pian mas napanlingkoran to ni Jehova. Saniban nampayunir si Maivor tan samay ading kon bii. Nan-Gilead iran dua nen 1984 tan natan et manlilingkor ira bilang misionero diad Ecuador.

Diad nanduruman lugar ya nanlingkoran yo bilang misionero, panon yon inyaplika may bilin ya, “Pansagpotan yoy ombuna diad dalin ya angitaneman ed sikayo”?

Mats: Lapud nanduruman lugar so nagmaliw ya asainmin mi, singa kami tanaman ya aminpigan inyalis-alis. Pero ginawa mi anggaay nayarian mi ya “nilamot” ed si Jesus. (Col. 2:​6, 7) Nansagpotan min aligen so alimbawa to, lalo lay inkamapaabeba to. Singa bilang, agmi la aalagaren ya mibagay ed sikami iray agagi. Sikami lay mibabagay ed sikara. No wala ray gagawaen da ya balo ed sikami, tatalosan mi no akin ya ontay gagawaen da, tan aaralen mi kultura da. Anggan iner so asainmin mi, alikas mi ya no diman mi mas aaligen si Jesus, diman mi met mas nalilikna ya singa kami mabunan kiew ya “intanem ed abay na manag-agus iran danum.”—Sal. 1:​2, 3.

Ann-Catrin: No say sakey ya kiew et inyalis, kaukolan toy sinag na agew pian tuloytuloy ya ombaleg. Si Jehova so “agew” mi. (Sal. 84:11) Inusar to ray agagi pian ipaliknad sikami so ampetapetang ya panangaro to. Singa bilang, nen wala kamid melag ya kongregasyon ed Tehran, Iran, mapapparawes tan maite-iter iray agagi! Anonotan mi laingen may inkamaparawes ya nababasa tayod Biblia. Labalabay mi asainmin mi diad Iran, pero nen Hulyo 1980, imbawal na gobierno ditan so kimey na Saray Tasi nen Jehova tan binagaan da kami ya kaukolan mi onalis ya tampol. Say sinmublay ya asainmin mi et diad Africa, diad bansan Zaire (say tawag la natan et Congo-Kinshasa).

Nen naamtaan ko ya diad Africa so asainmin mi, manakis ak. Abalitaan ko ya dakel so uleg tan nanduruman sakit diad Africa kanian natatakot ak. Pero oniay imbaga na duaran kakaaro mi ya abayag ya nanlingkor diman: “Agka natatakot. Sali yo labat! Seguradon naar-aro yoy Africa.” Ag-ira alingolingo! Maar-aro iray agagi ed Africa. Diad tua, nen kaukolan mi lay onalis kayari na anem taon ta imbawal na gobierno so kimey tayod Zaire, makakalek ak ed sarilik ta say pikakasik ed si Jehova et, “Ama, pansiansia yo kamid Africa.”

Anto ray naawat yon bendisyon?

Mats: Parad siak, baleg ya bendisyon imay dakdakel so akaaro min misionero ya nanlapud nanduruman bansa. Tan diad arum ya nanlingkoran min lugar, dakdakel so inyaralan mi Biblia. No maminsan ingen et onabot ed 20 so iyaaralan na kada sakey ed sikami, kanian agnasabaan so liket mi! Agko met nalingwanan so panangaro tan inkamaparawes na saray agagi tayod Africa. No ombibisita kamid saray kongregasyon diad Tanzania, say uugipan mi et diad van ya ipa-park mi ed abay na abung na agi. Mair-irap so bilay na agagi, pero seseguroen da ya niiiter day amin ya pankaukolan mi. Say iiter da et “lampas ni ingen ed pakasarag da”! (2 Cor. 8:3) Espisyal met ed sikami nen Ann-Catrin imay kayari na sanagew et manistoryaan kami. Pantongtongan mi ray agawa ed saman ya agew, tan pisalamatan mi Aman Jehova ta tinulongan to kami.

Ann-Catrin: Parad siak, say nanliketan kon maong, amay nakabat ko ray agagi ed nanduruman bansa. Dakel so naaralan min lenguahe—singa say Farsi, French, Luganda, tan Swahili. Tan nanduruman kultura so naeksperiensya mi. Tinulongan mi ray balo ed katuaan, dakel so akaaro mi, tan na-enjoy mi manlingkor ed si Jehova kaiba ira.—Sof. 3:9.

Dakel met so anengneng min makapabilib tan marakdakep ya palsa nen Aman Jehova. Kada no makaawat kami na balon asainmin, say pakalikna mi et singa kami manbiabiahe, tan diad dalan et kaiba mi Aman Jehova ya mangigigiya ed sikami. Dakel so naeksperiensya mi ya agmin balot nasali no agmi kaibay Aman Jehova.

Anto ray dinalan yon subok, tan antoy ginawa yo pian nasarag yo iratan?

Mats: Diad inlabas na saray taon, aminpiga kami met ya nansakit. Singa bilang, asali mi a-malaria. Wala met iramay panaon ya biglaan labat ya kaukolan ya operaan si Ann-Catrin. Aburido kami met ed saray atateng mi nen ontatatken la ra. Maong labat ta wadman may agik tan iramay agagi nen Ann-Catrin ya angasikaso ed sikara. Maan-anos, malikeliket, tan maar-aro dan inasikaso iray atateng mi. (1 Tim. 5:4) Tua, susuportaan mi met ira anggano arawi kami. Pero no maminsan, agmi naiwasan so naermenan tan nakonsiensia ta agmi ra naaasikaso.

Ann-Catrin: Nen 1983, nen wala kami ed Zaire, a-cholera ak. Say kuan na doktor ed si Mats, “Ipa-ospital mo la yay asawam ed arum ya bansa ta ni ompapatey la!” Diad tinmumbok ya agew, nambiahe kami paonlad Sweden. Say niluganan min eroplano et aliwan pampasahero ta anggapo lay naluganan min arum.

Mats: Manakis kami ta say amta mi agkami la makapanmisionero. Ataktakot ak ed samay imbagay doktor ya ompatey lay asawak. Pero maong labat ta inmabig! Kayari sakey taon, pinmawil kami ed Zaire. Tan say asainmin mi et diad Lubumbashi, diad melag ya kongregasyon ya say salita na agagi et Swahili.

Ann-Catrin: Nen wala kamid Lubumbashi, nanlukon ak pero nakalan ak. Agmi met plano so manpamilya. Pero agaylay ermen ko nen inatey may lukon ko. Wala balet so ginawa nen Jehova pian naligliwa ak—dakel so nigapo min Bible study! Anggapo ni sakey taon, amay kongregasyon mi ya 35 labat so publisher, nagmaliw ya 70! Tan dinmakel so mimiaral. Dati et 40 labat, pero nagmaliw ya 220! Bip-busy kamin maong ed ministeryo, tan benendisyonan nen Jehova iray sagpot mi, katon aligliwa ak ya maong. Pero siempre no maminsan, nanonotan tan napantotongtongan mi nin siansia imay baby mi. Tatalaranan mi la no panon ya paabigen nen Jehova so sugat ed puso mi diad Paraiso.

Mats: Wala met may panaon ya matmainomay ya nakesawan si Ann-Catrin tan kinmakkapuy so laman to. Diad saman met ya panaon, a-diagnose ak ya walay stage-four ya colon cancer ko tan kakkaukolan ko lay manpa-opera. Pero natan, ayos ak met la. Tan si Ann-Catrin, gagawaen to met so anggaay nayarian to diad panaglingkor.

Sankanonot mi ya aliwan sikami labat so ondadalan ed subok. Kayari to may pateyan ya agawad Rwanda nen 1994, binisita mi ray agagi diad refugee camp. Mair-irap so bilay da diman. Pero nen anengneng mi so pananisia, anos, tan inkamaparawes da, diman mi lalon apaneknekan ya talagan walay pakayari nen Jehova ya asikasoen iray lingkor to, anggan anto ni tay subok ya aarapen da.—Sal. 55:22.

Ann-Catrin: Say sakey nin nanonotan ko et amay agawa nen inmatendi kamid dedication na branch office ed Uganda nen 2007. Kayari na dedication, nambiahe kami la paonlad Nairobi, Kenya. Manga 25 kamin misionero tan Bethelite. Nen asingger kami lad ketegan na Kenya, walay kasabatan min truck ya mapmaples so batik to, tan bigla labat ya linmad linya mi kanian abangga to may bus ya niluganan mi. Inatey ya tampol may drayber, pati limaran kakaaro mi. Amay sakey ya sister, nibatik nid ospital, pero inatey lanlamang. Labalabay mi lan nanengneng lamet irayan kakaaro mi!—Job 14:​13-15.

Lapud samay aksidente, wala ray injury’k. Pero inmabig ak met lanlamang. Atan labat ta a-trauma kami nen Mats tan saramay arum nin pasahero lapud saman ya agawa. No maminsan ingen, man-anxiety attack ak. Nabangon ak na labi tan maninget so pagew ko, ya singa ak naaataki ed puso. Makapanerbiyos! Pian onkalma kami, manpipikasi kamid si Aman Jehova. Babasaen mi met iray paborito min teksto tan dadalepdepen mi iratan. Kinmonsulta kami met ed doktor ya espisyalista ed ontan ya sakit, tan balbaleg so nitulong to man. Natan et matalag met lan ontuka itan, tan mas amta mi lan kontrolen so liknaan mi. Ipipikasi mid si Jehova ya tulongan to kami pian naligliwa mi iramay ontan met so dadalanen da.

Panon kayon tinulongan nen Jehova ed saratan ya dinadalan yon subok?

Mats: Walay kasabihan ed Swahili ya “Tumebebwa kama mayai mabichi,” ya say labay ton ibaga et “Maal-alwar da kamin binembenan ya singa iknol.” Di ba no walay awit mon iknol, asisikasoen mo pian aga nabetag? Ontan ya ontan so ginawa nen Jehova ed sikami. Inasikaso to kamin maong ed kada asainmin mi. Agkamin balot apaulyanan. Sobsobra ingen so inter tod sikami. Aliklikna mi met so panangaro nen Jehova ed suporta na Mananguley ya Ulop.

Ann-Catrin: Wala tay agko nalinglingwanan ya alikliknak so panangaro tan suporta nen Jehova. Aminsan, walay tinmawag ed siak tan imbalita da ya walad ICU si tatay ko diad Sweden. Kakkaabig nen Mats ed saman ed malaria. Kulang so kuarta mi ya isaliw na ticket paonlad Sweden, kanian nandesisyon kami ya ilako mi la may kotse mi pian makasempet kami. Nagugunoyan, wala lamet so tinmawag. Walay sanasawa ya abalitaan day agawa, tan labay dan sagoten so sakey ya ticket. Insan wala lamet so tinmawag. Sakey ya maedad lan sister ya walay atipon ton kuarta diad kahon ya sinulatan ton “Parad agi ya mankakkaukolan.” Agak makapanisia! ‘To the rescue’ ya tampol si Aman Jehova!—Heb. 13:6.

No pawilen yoy 50 ya taon ya impanlingkor yon full-time, antoy naaralan yo?

Ann-Catrin: Apatunayan ko ya tua may ibabaga na Biblia ya ‘say biskeg tayo et akadepende ed pansiansia tayon kalmado tan pangipatnag tayoy panagmatalek.’ No manmatalek tayod si Jehova, ibaan to tayon milaban pian manalo tayod antokaman ya subok ya dadalanen tayo. (Isa. 30:15; 2 Awa. 20:​15, 17) No iter tayoy sankaabigan tayod sikato ed kada asainmin ya nanaawat tayo, agnasabaan tan agnaparaan iran bendisyon so iter tod sikatayo.

Mats: Say sakey ed saray naaralan ko et no manmatalek ak ed si Jehova ed antokaman ya situasyon, sikato so onkiwas parad siak. (Sal. 37:5) Anggapo tay nanonotan ko ya agto ak tinulongan nen Jehova. Anggad natan et tutulongan to kami ni ed asainmin mi diad Bethel ed Myanmar.

Amta mi ya wala ray kabataan natan ya labay da nin aruman so nagagawaan da parad si Jehova. Komon ta nalikna da met imay matoor ya panangaro ya impalikna nen Jehova ed sikami. No manpausar ira ed si Jehova, seguradon tulongan to iran ombuna inerman so pangitaneman to ed sikara.