Pinasimpli Mi so Bilay Mi

Mainaway bilay nen Madián tan Marcela diad Medellín, Colombia. Baleg so sueldo nen Madián, kanian manaayam irad balibalin apartment. Balet walay agawa ya amakiwas ed sikaran aralen iray prayuridad da bilang lingkor nen Jehova a Dios. “Nen 2006, inmatendi kami ed ‘Pansiansiaen a Simpli so Mata Yo’ ya sirkiton asemblea. Indanet ed saray paliwawa ya pian mas napanlingkoran so Dios, kaukolan min pasimplien so bilay mi,” so imbaga da. “Nen pasempet kami, naisip mi ya aliwan simpli so bilay mi. Magastos kami tan dakel so utang mi.”

Lapud saray nadngel da ed paliwawa, ginapoan nen Madián tan Marcela ya pasimplien so bilay da. “Unona, intunda mi lay pansaliw lan pansaliw,” so imbaga da. “Insan kami inmalis ed mas melag ya apartment, inlako mi luluganan mi, tan angaliw kami motor.” Tinundaan da met lay onlad mall pian ag-ira natukson mansaliw lan mansaliw. Mas dakel lay panaon ya uusaren da pian napulongan da iray totoo nipaakar ed Biblia. Tan akiulop ira ed saray kakaaro da ya maseseg ya manlilingkor ed si Jehova a Dios bilang espisyal payunir.a

Ag-abayag, nandesisyon si Madián tan Marcela ya palaknaben ni so ministeryo da tan inmalis ira pian ontulong ed sakey ya melag a kongregasyon. Pian makaalis ira ditan, kaukolan ya onekal ed trabaho si Madián. Inisip na supervisor to ya natatapis lay Madián. Kanian oniay inkatunongan nen Madián ed samay supervisor to: “Tua, dakel so kuarta yo, pero maliket kayo kasi?” Inamin na supervisor to ya aliwan maliket, ta dakel iray problema to ya agto nasolusyonan. Kanian imbaga nen Madián ed sikato: “Kanian agto labay ya ibaga ya no dakel so kuartam et maliket ka la. Say importante et antam no anton talagay mamaliket ed sika. Malikeliket kami nen asawak no ibabangat mi ray totoo nipaakar ed Dios, tan labay mi ni magmaliw ya mas maliket kanian labay mi nin aruman so panaon mi parad sayan kimey.”

Malikeliket tan kontento si Madián tan Marcela lapud iyuuna dad bilay so panlingkor ed Dios. Diad apalabas ya 13 taon, tinmulong ira ed saray mankaukolan ya kongregasyon diad northwest Colombia. Tan natan et malikeliket iran manlilingkor bilang espisyal payunir.