Impaliwawa na Orthopedic Surgeon so Pananisia To

Akin et interesado kayod science?

Manlapu la nen ugaw ak, labalabay ko ray tanaman tan ayayep. Binmaleg ak diad Richterswil, sakey ya marakdakep a baryon asingger ed Lake Zurich. Ipapasyar ak na saray atateng ko tan agagik insan da ituturod siak iray nanduruman tanaman tan ayayep ya nanenengneng mid dalan.

Akin et orthopedic surgery so inaral yo?

Akapantrabahoy tatay ko bilang assistant diad operating room ed ospital dimad lugar mi. Lanang dan iistoryaen ed sikami iray gagawaen da no operasyon. Agustoan ko ray istorya da kanian nen kien et pinilik ya propesyon so surgery. Nan-espisyalista ak ed orthopedic surgery ta labalabay koy mekanikal ya aspekto to. Saray orthopedic surgeon et kaukolan ya manisip a singa engineer pian na-repair da iray pukel, muscle, tan ula-ulat ya mamapagalaw ed sikatayo.

Say sankaimportantian ed amin, malikeliket ak no nanenengneng kon onaabig iray pasyentek. Balibali liknaan ko no makakatulong ak ed arum.

Akin et nanduda kayon walay Dios?

Tinedyer ak ni et duda ak la, tan walay duaran rason. Unona, naamtaan kon wala ray manbabangat ed simbaan ya imoral, kanian adisdismaya ak. Komadua, wala ray biology teacher ko ya manisiad evolution​—ya anisiaan ko met la, lalo nen nanaral ak ed university.

Akin et anisia kayo ed evolution?

Anisia ak ed saray propesor ko. Sakey ni, wala ray ayayep ya parehoy anatomy da kanian inisip kon saksakey labat so nanlapuan da tan posiblin wala ray onlesan balon species lapud genetic mutation.

Akin balet et angumay isip yo?

Walay kaarok ya angitagar ed siak diad aral na Saray Tasi nen Jehova. Manbilib ak ta makaaro ira tan akaaral ak ed saray paliwawa. Aminsan, binisita ak na biin maomaong so ugali to ed saman ya kongregasyon, tan tinepetan ko, “Panon kon naseguro ya tua so Biblia?”

Impanengneng tod siak iray propesiyad Biblia ya nagagawa lad panaon tayo. Say sakey ya alimbawa et samay propesiya nen Jesus ya diad sayan kaunoran iran agew et dakel so guerra ed interon mundo, “maksil a yegyeg,” tan onggrabe “salot tan eras.”a Impanengneng to met iray propesiya ya onuges so ugali na totoo tan lalon ondakel iray masaol tan mauges, ya talagan nagagawa la natan.b Ag-abayag, inaral kon maong so Biblia tan diman ko apruebaan ya lanang ya ontutua so ibabaga to. Diman ko met ineksamin so papanisiaan ko ya nanlapuay bilay.

Akatulong ta so impanaral yoy medisina pian natalosan yoy nanlapuan na bilay?

On. Nen ginmapo ak ya nanaral na Biblia, manre-research ak ed saman ed panag-opera na pueg. Nen bandad sampot na 1960’s, mas atalosan na saray scientist so komplikadon igagalaw na pueg. Naamtaan dan say pueg tayo et aglabat onggagalaw ed saksakey ya direksion ya singa bisagra. Imbes, ontetelek tan onkukudyas itan​—makapabilib itan ya kombinasyon​—lapud satan et sarag tayoy onakar, ombatik, onsayaw, tan arum ni.

Manga 40 taon lan mandedesinyo iray researcher na artipisyal ya pueg. Balet mairap ya aligen so pueg na too ta komplikado. Sakey ni, no ikomparad pueg tayo, ag-ombayag iray artipisyal ya produkto. Anggano de-kalidad nin materyales so usaren da, maliket la ra no nasabi toy 20 taon. Siempre, say pueg tayo et gawad mabilay iran selula a lanang ya nasasalatan. Parad siak, say pueg et ebidensya na karunongan na Dios, aliwan evolution.

Say mutation ey, tan samay ibabaga yon wala ray species ya parehoy anatomy da?

Papaneknekan na satan ya saksakey so Managdesinyo. Sakey ni, agpararakepen na mutation so desinyo na mabilay iran organismo. Agto ra pagmaliwen ya duman klase na tanaman o ayep. Diad tua, dederalen na mutation so genes. Tan agbalot itan makagawa na makapakelaw a desinyo ya singa say pueg​—tan arum nin parte na laman na too.

Akin ya nagmaliw kayon Tasi nen Jehova?

Nen iyaaplikak la ray prinsipyo na Biblia, anguma-uman so bilay ko. Insan nen 2003, inmatendi ak ed international convention na Saray Tasi nen Jehova tan anengneng koy pankakasakey da, ya singa ra saksakey a pamilya, anggano diman labat ira nankakabat. Tuay panangaro dad sakey tan sakey, tan labay kon sakey ak met ed sikara.