Nagagawa ed Middle East

Saray Canaanitan Managgaway Alak

Nen 2013, akotkot na saray archaelogist so maawa-awang ya kuarton pangiyaatolay alak ya manga 3,700 taon lay kabayag to. Diad satan a kuarto et walay 40 ya angkakabaleg a buyog ya sarag ton panoey 3,000 ya bote na alak ya uusaren ed panaon tayo. Inaral na sakey ya archaeologist so gaer ya walad saray buyog tan naimano ton talagan maalwar ya manggaway alak iray Canaanita. Imbaga to: “Diad amin a buyog et istrikton atumbok so parehon timpla na sayan alak.”

KASIN ANTAM LA? Diad Biblia, binitlan diad Israel nensaman et manggagawa ray “sankaabigan ya alak” tan ikakarga dad saray baleg a buyog.​—Kanta nen Solomon 7:9; Jeremias 13:12.

Biglan Indakel na Populasyon

Diad Egypt, mas dakel na 560,000 so niyanak nen 2012 nen say nen 2010 base ed report na dyaryon Guardian. “Aya lay sankarakelan ed interon history na Egypt,” so kuan nen Magued Osman na Baseera, sakey a kompanya ya manre-research diad Egypt. No mantultuloy so onian idakel, ibabaga na saray eksperto ya lalon onkulang so danum, kuryente, tan naakan ed bansa.

KASIN ANTAM LA? Base ed Biblia, gagala na Dios ya “makmakan” na totoo so dalin odino panoen da diad dugarugan karakel, tan iter tod sikaray amin ya kaukolan da.​—Genesis 1:28; Salmo 72:16.

Adiskobre Iray Inkotkot ya Barya

Adiskobre diad asingger ed highway na Israel so masulok ya 100 a bronze ya baryan akaukit so “Komapat a Taon.” Sayan petsa et komapat ya taon na impanrebelde na saray Judio ed saray Romano (69-70 C.E.) ya nanresultad impaneral ed Jerusalem. “Nayarin natatakot imay too ta asingger lay anggaan—ompan nanenengneng ton manasingger la ray Romanon sundalo,” so kuan nen Pablo Betzer, sakey a mangidadaulo ed panagkotkot. “Inyamot toy kuarta to tan plano ton pawilen.”

KASIN ANTAM LA? Nen 33 C.E., impasakbay nen Jesus ya onlusob iray Romano ed Jerusalem. Binagaan to ray Kristiano ya ombatik ed kapalandeyan pian nisalba ira.​—Lucas 21:20-24.