Say Beklew na Gilata

PANKELAWAN na saray mechanical engineer so abilidad na gilata ya mangawit na mas ambelat na aminpigapiga nen say laman to. Pian natalosan iya, saray engineer ed Ohio State University, U.S.A., et nanggawa na computer model pian aralen so laman na gilata, say inkagawa ra, tan no panon ya onggagana iray parte na laman da. Pian nagawaan irayan model, angusar ira na saray nanduruman image ya manlapud X-ray (micro CT scan) tan inalig da so kabiskeg na puersa ya uusaren na gilata no mangaawit.

Sakey ya importantin parte na laman na gilata et say beklew to, ya wadtan so belat na akatangal ed sangi to. Saray anlemek ya tissue ed beklew na gilata so akakonekta ed anawet ya exoskeleton ed laman (thorax) tan ulo to ya singa saray nankakawetan ya gamet na nanlaktipan iran lima. “Say desinyo tan inkagawa na sayan impankonektaan et importantin maong ed no antoy nagawaan na beklew,” so inkuan na sakey ed saray researcher. “Sayan nikadkaduman impankonektaan na anawet tan anlemek ya parte na laman so rason no akin ya mas mapeket itan tan nayarin sakey ya importantin kabiangan na desinyo kanian sarag na beklew so mangawit na ambelbelat.” Iilaloan na saray researcher ya no natalosan da no panon ya onggagana so beklew na gilata et ontulong itan ed iyaligwas na panaggaway robot ya uusaren ed makina.

Antoy nibagam? Kasin say mabisbiskeg a beklew na gilata, ya komplikadoy impankokonektaan na saray parte to, et produkto na ebolusyon? Odino walay nandesinyo?