Say Buek na Tahong ed Dayat

SARAY tahong ed dayat et ompepeket ed saray bato, kiew, odino baloto. Balet aliwan singa saray arum ya shell ed dayat ya malet dan ipeket so mismon laman da, say ipepeket labat na saray tahong et aramay singa maim-impis ya buek ya tatawagey byssus. Lapud satan et matmainomay day mangan tan onalis na ayaman. Balet no nengnengen, singa mainomay iratan ya napultot no maksil so daluyon. Panon ya makakatulong so byssus pian makapeket iray tahong tan ag-ira niyanor?

Nonot mo pa: Say byssus et walay partin matalker tan wala met so partin makulaney tan mainomay ya ompinat. Adiskobre na saray researcher ya sayan dugarugan kombinasyon—ya 80 porsiento so matalker tan 20 porsiento so makulaney—et kakkaukolan pian talagan mapekepeket. Kanian agnapultot so byssus anggano ibasig-basig na maksil ya daluyon.

Imbaga nen Professor Guy Genin ya “makapakelaw” so adiskobre ed sayan research, tan imbaga to ni: “Say sekreto et say makapabilib ya kombinasyon na makulaney tan matalker ya parte.” Panisiaan na saray scientist ya say desinyo na byssus et nayarin usaren ed nanduruman paraan, singa diad pangikabit na saray kagawaan diad saray bilding tan submarine, pangisuldong na ulat ed saray pukel, tan pandait ed sugat kayari operasyon. “No say pantongtongan et malet ya panagpeket, dakdakel so naaralan tayod saray walad kaliberliber tayo,” so imbaga nen J. Herbert Waite, sakey a professor diad University of California ed Santa Barbara, U.S.A.

Antoy nibagam? Kasin say buek na tahong ed dayat et produkto na ebolusyon? Odino walay nandesinyo?