Say Makapakelkelaw ya Arctic Tern

ABAYBAYAG lan panisiaan na saray researcher ya saray arctic tern et ontitikyab na manga 35,200 kilometro diad biahe ra manlapud Arctic region paonlad Antarctica ya anggad makapawil irad Arctic. Balet diad agano ni ran impan-research, naamtaan ya mas arawi ni manaya so biabiahien da.

Wala ray angkekelag ya geolocators ya impeket ed pigaran arctic tern. Saratan ya geolocators et singa labat paper clip so kabelat da, tan anengneng ed saratan a device ya wala ray arctic tern ya ontitikyab na manga 90,000 kilometro diad papawil-patubon biahe ra​—atan so sankaarawian ya amta tayon migration na ayayep. Wala ni ingey sakey ya ngalngali 96,000 kilometro so tinikyab to! Akin et anguman so naamtaan ya kaarawi na biahe ra?

Anggan iner so panlapuan na saray arctic tern, aliwan dirediretso so rota da. Singa nanengneng ed tagey, say kaslakan ya rota dad Atlantic Ocean et singa S. Akin ey? Sasabayan na saray arctic tern so direksion na dagem.

Legan na 30 taon ya pambilay da, saray arctic tern et nayarin manbiahe na masulok ya 2.4 milyon ya kilometro. Singa itan mamitlo o mamipat ya papawil-patubo ya biahe ed bulan! “Makapakelkelaw iyan nagawaan na siwit ya masulok labat ya 100 gramo,” so inkuan na researcher. Sakey ni, lapud summer so iyaakar na saray arctic tern ed north tan south pole, “mas dakel ya liwawa na agew so nanenengneng da nen say arum ni ran pinalsa,” so inkomento na libron Life on Earth: A Natural History.