4 Panamerdona

NO ANTOY LABAY YA IBAGA NA SATAN

Say labay ya ibaga na panamerdona et palampasen so lingo tan lingwanan so sakit na linawa. Agkabaliksan na satan ya palelemewen moy lingo odino iisipen mon singa anggapoy agawa.

PRINSIPYO ED BIBLIA: “Itultuloy yon itepel so sakey tan sakey tan mabulos a perdonaen so sakey tan sakey anggano walay rason na sakey ya ireklamo imay sakey.”​—Colosas 3:13.

“No inarom so sakey, agmo la imanoen iray kakapuyan to, say nengneng mo et no antoy gagawaen to pian magmaliw a maong ya too.”​—Aaron.

NO AKIN YA IMPORTANTE

No manem-em kay sakit na linawa, apektadoy laman tan emosyon mo, pati say relasyon yon sanasawa.

“Aminsan, kinmerew na perdona si asawak lapud asakitan to ak ya maong. Nairapan ak ya perdonaen. Aperdonak met lanlamang, pero say pagbabawian ko, agko pinerdonan tampol. Lapud satan, walay tensyon ed baetan mi.”—Julia.

NO ANTOY NAYARIN GAWAEN MO

ISIP MO PA

Diad ontumbok ya nasakitan ka ed ibaga odino gawaen na asawam, tepetan moy sarilim:

• ‘Kasin masyado ak ya sensitibo?’

• ‘Kasin baleg so lingon ginawa to ya kaukolan toy onkerew na perdona ed siak, odino napalampas ko la itan?’

PANTONGTONGAN YON SANASAWA

• Maslak et panon kabayag antis ta’n naperdona so sakey tan sakey?

• Antoy gawaen ta pian mas mainomay ta’n naperdona so sakey tan sakey?

SUHESTION

• No asakitan so liknaan mo, agmo iisipen ya ginagala ton sakitan ka.

• Palampas mo lay ginawa na asawam, tan tandaan mo ya “amin tayo et naynay a nalilingo.”—Santiago 3:2.

“Mas mainomay so mamerdona no pareho kamin walay kasalanan, pero mas mairap no sakey labat so alingo. Kaukolan so inkamapaabeba pian naperdonam.”​—Kimberly.

PRINSIPYO ED BIBLIA: “Miaregloan kan tampol.”​—Mateo 5:25.