No aralen moy mankuli ed trabahom, singa ka mani-exercise; nagunggonaan ka natan tan diad arapen
PARAD SARAY KABATAAN
11 Inkakuli
NO ANTOY LABAY YA IBAGA NA SATAN
Saray makuli et ag-oniiwas ed kimey. Imbes, panliliketan day mantrabaho pian nitarya da ray pankaukolan da tan natulongan day arum—anggano aliwan masyadon marakep so trabaho da.
NO AKIN YA IMPORTANTE
Anggano bilang agtayo labay, dakel so responsabilidad tayo. Diad sayan mundo ya dakel so agmalabay ya mantrabahon impasya, walay maong ya epekto no makuli ka.—Eclesiastes 3:13.
“Naaralan ko ya no mankuli ka, proud ka ed nagagawaan mo tan talagan maliket ka. Satan ya liknaan so tinmulong ed siak pian na-enjoy koy mantrabaho. No maong kan mankimey, nawalaan kay maong ya reputasyon.”—Reyon.
PRINSIPYO ED BIBLIA: “Walay nagunggona ed kada kimey a pansasagpotan.”—Proverbio 14:23.
NO ANTOY NAYARIN GAWAEN MO
Naaralan moy magmaliw ya positibo ed trabahom no tumboken mo iraya.
Manliket ka legan mon aaralen so trabahom. Balanglan mankikimey ka ed abung, gagawaen moy asainmin mo, odino mantratrabaho ka, seryosom so gagawaen mo. No marunong ka la, mananap kay paraan pian na-improve mo itan—mas ompeles o mas ondunong ka. No mas ondudunong ka—mas na-enjoy moy gagawaen mo.
PRINSIPYO ED BIBLIA: “Wala ta lay anengneng mon marundunong a mankimey? Sikatoy onalagey diad arap na arari; sikatoy ag-onalagey diad arap na ordinaryon totoo.”—Proverbio 22:29.
Nonot moy pankaabigan na arum. Diad amin lawarin situasyon, no gagawaen mo ray responsabilidad mo, natulongan moy arum. Singa bilang, no makuli kan mankimey ed abung, onlemew so kimey na arum ya kapamilyam.
PRINSIPYO ED BIBLIA: “Mas makapaliket so mangiter nen say mangawat.”—Gawa 20:35.
Gawam so mas ni nen say dapat mon gawaen. Imbes ya gawaen mo labat so trabahom, gawam so mas ni nen say dapat mon gawaen. Diad ontan, sika so mangokontrol ed bilay mo—gagawaen mo itan, aliwan lapud pinilit ka na arum noagta labay mo.—Mateo 5:41.
PRINSIPYO ED BIBLIA: “Say panggawam na maong et aliwan lapud apilitan ka labat, noagta lapud labay mon gawaen itan.”—Filemon 14.
Magmaliw ya balanse. Saray makulin totoo et aliwan mangiras tan aliwa met iran sobsobran mantrabaho. Balanse ira tan panliliketan day mantrabaho pero manpapainawa met ira.
PRINSIPYO ED BIBLIA: “Mas maong ni daiset a painawa nen say alablabas a panagkimey tan panguusil ed dagem.”—Eclesiastes 4:6.