1. Kasin say Dios so Natetel ed Paniirap Tayo?
No Akin ya Importantin Naebatan Itan
Dakel so totoon agda labay so mandayew ed Dios lapud iisipen dan sikatoy panlalapuan na saray paniirap tayo.
Isipen pa
Direkta man odino diad agnaliklikas ya paraan, ibabangat na dakel ya lider na relihyon ya say Dios so panlalapuan na paniirap tayo. Singa bilang, oniay ibabaga na arum:
Saray kalamidad et dusa na Dios.
Ompapatey iray ugugaw lapud kaukolan na Dios so kaaruman ya anghel ed tawen.
Walay papanigan na Dios ed saray guerra—say pansesengegan na graben paniirap.
Balet, posible kasin aliwa so ibabangat na saray lider na relihyon nipaakar ed Dios? Panon to no ag-ira manaya aabobonan na Dios?
MANARAL NI
Bantayan so video ya Akin ya Aralen so Biblia? diad jw.org/pag.
No Antoy Ibabaga na Biblia
Agmanlalapud Dios so paniirap tayo.
Ta no sikato so panlalapuan na paniirap, kontra itan ed saray kualidad to ya nabasa ed Biblia. Singa bilang:
“Amin a dalan [na Dios] et inkahustisya. . . . Sikatoy matunong tan maptek.”—DEUTERONOMIO 32:4.
“Agbalot manggaway mauges so tuan Dios, agbalot manggaway aliwa so Makapanyarin-amin!”—JOB 34:10.
“Agpipikeweten na Makapanyarin-amin so hustisya.”—JOB 34:12.
Ag-aabobonan na Dios iray relihyon ya aliway ibabangat da nipaakar ed sikato.
Kaiba ed saratan iray relihyon ya mangibabangat ya say Dios so panlalapuan na paniirap tayo, tan saramay relihyon ya mibabali odino kokonsintien day guerra tan inkaruksa.
“Katilaan so ipropropesiya na sarayan propeta diad ngaran ko [Dios]. Agko ra imbaki odino ingganggan odino akitongtongan. Palson pasingawey tan . . . panamalikdo na dilin puso ra so ipropropesiya rad sikayo.”—JEREMIAS 14:14.
Kinondena nen Jesus so pansimpisimpitan na relihyon.
“Aliwan balang sakey ya ontatawag ed siak na, ‘Katawan, Katawan,’ et makaloob ed Panarian na tawen, noagta saman labat so manggagawa ed linawa nen Amak a walad tawen. Diad satan ya agew et dakel so mangikuan ed siak: ‘Katawan, Katawan, agta nampropesiya kami diad ngaran mo, tan amapaway kami na saray demonyo diad ngaran mo, tan nanggawa kami na dakel a makapanyarin gawa diad ngaran mo?’ Balet ta ibagak ed sikara: ‘Agta kayon balot kabat! Arawi kayod siak, sikayo ran manggagaway kaugsan!’”—MATEO 7:21-23.